Shillong, Jylliew 16 : Ki nongtrei jong ka Mawmluh Cherra Cement Limited ha ka sngi Palei ki la weng noh ïa ka jingïakhih kaba la ïaid mynta lai sngi, hadien ba ka sorkar jylla ka la kular ban bishar bniah mardor halor kitei ki mat jingdawa ba ki buh.
Haba kren bad ki lad pathai khubor, u President jong ka Mawmluh Cherra Cement Employees Union, Bah Shanlang Diengdoh u la ong, “Na ka liang ka sorkar ki la kyrpad ïangi ban weng shwa ïa ka jingïakhih na ka bynta shi taiew ban bishar bniah halor ki lai tylli ki jingdawa.”
Katkum ka jingong jong u, ki jingdawa kiba hakhmat eh ba ki nongtrei MCCL ki buh hakhmat ka sorkar ka dei ka jingsiew ïa ka tulop, nangta halor ka VRS nalor kiwei kiwei.
“Ki la kular ïangi ba kin sa pyntip sha ka sorkar bad hadien ba la ïoh ïa ka jingmynjur kin sa pyntip pat shangi. Kumta na ka liang jogngi, ngi la shim ïa ka rai ban weng noh shwa ïa jingïakhih naduh mynta ka sngi, 16tarik u Jylliew,” bynrap biang u President.
U la ong ruh ba kin ïai ap shwa na ka bynta shitaiew kumba la ong ka sorkar bad dei hadien kane kin sa shim pat ïa ka rai. Katkum ka jingïathuh jong u, tang ka tulop lada ka sorkar ka siew man la u bnai kan poi beit kumba 1 klur ne tam khyndiat.
La ïathuh ruh ba la pyntip ïa ki ba na ka liang ki bor pynïaid jong ka MCCL ryngkat ki nongmihkhmat na ka thaiñ kin sa shong ïa ka jingïalang bad u Myntri Rangbah ha ka sngi Nyngkong.
