Shillong, Ïaïong 03: Ka Khasi Students’ Union mynta ka sngi ka la ïoh ban kynduh ïa ka Committee ba la thaw da ka Sorkar jylla ban pynthymmai ne pynbha ïa ka MPSC. Ïa kane ka Committee la lamkhmat da u Bah F. R Kharkongor, IAS kum u Chairman ha jingdon ryngkat u Cyril V.D. Diengdoh IAS bad Prof. David Syiemlieh kum ki member bad kiwei kiwei.
Ïa kane ka Committee la thaw hadien ba ka Seng ka la buh ïa 20 tylli ki mat jingdawa hakhmat ka Sorkar ban pynthymmai ïa ka rukom treikam ha MPSC.
Kane ka Committee ka la dep buh ruh ïa ka jingkyrpad sha ki paidbah ban ai jingmut (suggestions) halor ka jingpynthymmai ïa ka MPSC kaba la kut ha u bnai Rymphang.
Ha kane ka sngi ka seng nalor ki 20 tylli ki mat jingdawa ba ka la dep buh, ka la pynsngew ruh halor ka jingmih ki recruitment board ha kine ki sngi ki bym shym don kino kino ki kyndon aiñ halor ka thungkam thungjam bad ki rai ba ka mih na kane ka Committee (recommendations) dei ban phah ruh sha kine ki recruitment boards bad ka DSC ba ka thungkam thungjam kan long kaba khuid.
Ka Seng ka la ai jingmut ruh ban pynduna ïa ka pisa eksamin bad ban buh kyndon ruh ban ailad ïa ki briew kiba duna ha ki dkhot met ba kin lah ban apply bad ban ïaleh ïa ki eksam thungkam katkum ka aiñ.
