Buh jingma ka surok NH-6 ha Narpuh EJHD namar ka jingtwa jur ka surok ha Lumshnong bad jinghap khyndew ha katei ka thaiñ

Khliehriat jylliew 16: Namar ka jingther jur palat u slap ka la wanrah ïa ka jingtwa ka surok, ka jingtwa khyndew ha kiba bun ki jaka ha ka surok national highway ha ka thaiñ Narpuh East Jaiñtia Hills District bad kane ka la buh jingma ïa ki nongleit nongwan, ka jingtwa ka surok ka la jur bha ha Lumshnong hajan ka Tool Gate.
Ha katei ka jingtwa surok kaba la jur bha ha Lumshnong haduh ba ka surok ka la jan dkhut, ki la don ki kali heh bad kawei ka kali rit alto 800 kaba la liat ha ka jingtwa, donbok ba ym don kano kano ka jingjia kaba sngewsih namar kiba ñiah ïa kitei ki kali kim don shuh hapoh kali.
Kat haduh ba thoh ïa kane ka khubor ka jinghdneg kali ha ka thaiñ Narpuh East Jaiñtia Hills District ka dang bteng, kane ka la buh jingeh haduh katta katta ïa ki nongleit nongwan khamtam kito kiba dang sahkut kali ha ki jaka bym don wat tang ki dukan ban bam ban dih.
Nalor kitei ki jingshah lynshop ba ishyrkhei, ka surok national highway ha Lumshnong ruh ka la long kum ka wah bah na ka daw ka jingwan tuid kyrthep ka um kaba jur ha surok bah, ki kali kim lah shuh ban iaid lyngba na ka daw ka jingjur palat ka jingtuid kyrthep ka um ha surok bah.
Ha kajuh ka por, ka la don ruh ka jingtwa ki lum, ka jingtwa ka khyndew ha kiba bun ki jaka ha ka thaiñ Narpuh ha kaba ka la wanrah shuh shuh ïa ka jingthut ka ïaid ka ieng jong ki kali.