Shillong, Lber 31: Ka MDC elekshon kaba la dep ban long sha ki ar tylli ki ïing dorbar thawaiñ ki district council, ka KHADC bad JHADC kaba la long ha u bnai Rymphang ka jinglut kala kot sha ka 11,99,50,000 tyngka.
Ka ïing dorbar thaw aiñ ka jylla ha ka dorbar mang tyngka kaba la dep kala pynlait ïa kane ka pisa khnang ba ka District Council Affair kan ïoh ban siew noh sha kito baroh kiba la don bynta ha kaba pynïaid ïa ka MDC elekshon.
Kane ka jingsiew ka kynthup, ïa ki briew sorkar kiba la pyndonkam ha ka elekshon, ka jingsiew ïa ka bai wai kali, ïa ki kontraktor kiba pynbiang ïa ka bam, kiba shna ïa ki pandal bad ïa ka bai umphniang jong ki ki kali ba la pyndonkam da ki ophisar.
Ka jinglut na ka bynta ka elelshon sha ki ïing dorbar jong ki District Council baroh la pynlut na ka pla pisa jong ki District ïa kaba ka DC (A) ka shulong tang ka nongpynïaid ïa ka elekshon.
