Shillong, Jylliew, 14: Shwa ba ka jylla kan leit sha ka Ilekshon sha ka Ingdorbar Thawaiñ ka ban sa long ha u snem 2023, ka Khun Hynniewtrep National Awakening Movement (KHNAM) ha kane ka kynti hapoh ka jingïalam jong u Bah Adelbert Nongrum ka la ïoh ïa ka jingtyrwa na kiwei ki seng riewlum ban ïatreilang kum kawei ka kynhun kaba khlaiñ kaba long kum ka jingïatylli hapdeng ki seng riewlum ha kane ka jylla Meghalaya.
Haduh mynta, dei tang ka United Democratic Party (UDP) bad ka Hill State Peoples Democratic Party (HSPD) kiba ju ïatreilang hapoh ka lama jong ka Regional Democratic Alliance (RDA) naduh ka elekshon 2018.
Hynrei dang shen u President ka HSPDP u Bah KP Pangniang u la ïathuh ba naduh ka elekshon MDC-2019 ba ka UDP bad ka HSPDP ki la rai ban ïaid la ka jong.
“Lada ngi poi sha ka jingïasngewthuh jingmut bad ka kynhun ba la ïalam da u Bah Pyndap Saibon, ngi sngewthuh ba ngin hap ban ïatehlok bad kano kano ka seng riewlum khnang ban wanrah ïa kawei ka kynhun seng riewlum kaba khlaiñ,” ong u Bah Adelbert Nongrum ha ka jingïakren bad ki lad pathai khubor.
“Ka jingïakren (bad kiwei ki seng riewlum) ka dang ïaid bad kam bym pat rai eiei,” u la ong.
“Hapdeng kine ki por, ki paidbah ki la kulmar jingmut bad nga ngeit skhem ba lada ngi poi sha ka jingïasuk (bad u Bah Pyndap Saibon) kumba la don ka jingpyrkhat bad ki katto katne ki Regional Party bad ngi kum ki party trai-ri ngi ïa la kren ba kumno ngin wanrah ïa kawei ka kynhun kaba khlaiñ,” u la ong.
Haba kylli, u la ong ba kane ka jingtyrwa ka la wan na kiwei pat ki seng riewlum khlem ka UDP.
