Shillong, Lber 14: Ka Dorbar Mang Tyngka jong ka Khasi Hills Autonomous District Council (KHADC) kan sdang naduh ka 26 tarik mynta u bnai.
La ong ba ha kane ka Dorbar Mang Tyngka kaba nyngkong kaba ïalam da ka Executive Committee ba thymmai, yn wanrah ïa ka Mang Tyngka jong ka Council ban ïoh ïa ka jingmynjur na ka dorbar, ban ïoh siew tulop jong ki MDC bad ki nongtrei jong ka Council bad ban lah ruh ban pyntyllun shakhmat ïa ki kam jong ka Council baroh kawei.
U Secretary ka Legislative jong ka KHADC ula pynbna tang ïa ka sngi ban sdang ïa ka Dorbar ha ka 26 tarik u Lber bad ym shim la pynpaw eiei haduh katno sngi kane ka Dorbar Mang Tyngka kan neh.
Ka tyllong khubor kiba la ïohlum la ïoh jingtip ba kane ka Dorbar ka lah ban long 3 ne 4 sngi, ban ailad ïa ki MDC ban ïoh ban ïatai halor ki mat bapher bad khamtam ban pynlong noh ïa ka elekshon ban jied ïa u Deputy Chairman ba thymmai jong ka KHADC.
