Rai u Bah Adelbert ban hiar na ka shuki President lada ïasuk bad u Bah Pyndap

Shillong, Jylliew, 14: U MLA jong ka Khun Hynniewtrep National Awakening Movement (KHNAM) u Bah Adelbert Nongrum ha ka sngi Baar u la phah ïa u kyrwoh lyngba ki lad pathai khubor ba u long uba kloi ban ïasuk, ban ïamap bad ban ïa klet noh ïa ki jingjia kiba ladep kumba u Bah Pyndapborthiaw Saibon u la pynpaw ba u long uba kloi ban ïatreilang na ka bynta ban pynkhlaiñ biang ïa ka KHNAM na ka bynta ban pynkhreh ïa ka ilekshon sha ka Iingdorbar Thawaiñ ka ban sa long ha u snem 2023.
“Bah Pyndap Saibon bad ka kynhun jong phi, to ngin ïa don lang kum kawei ka ing ka sem bad ngin ïa long rangbah, sngewbha shim ïa kane kum u kyrwoh lyngba ki lad pathai khubor ban shimkhia ba ha ka 17 tarik, ha ka por 3:30 bajengin ïakynduh ha iing jong nga,” ong u Bah Adelbert Nongrum ha ka jingïakren bad ki lad pathai khubor.
Haba pynpaw ba jingïakhun ha ka 17 tarik mynta u bnai kan dei ruh ka sien kaba khatduh ban ïakren, u Bah Adelbert u la ong, “wat ym shim ba ka jingwan jong phi sha ka ing jong nga ka long ba phi pyndem hakhmat nga hynrei nga ruh ngan iehnoh ïa ka kam President ym namarba nga pyndem hakhmat jong phi, hynrei ngin shim ïa kane ka sienjam ban pynim biang na ka bynta ban ai jingkyrmen bad ban ai jingshngaiñ ba ka ri ka donkam palat bad ba kan long ka jingshynraiñ ïa ki nongwei ki nongar.”
Katkum ka jingïathuh jong u Bah Adelbert, kane ka jingïasngewthuh jingmut hapdeng jong u bad u Bah Pyndap Saibon ka long hadien ka jingïakynduh kaba la long ha ka 25 tarik, Lber mynta u snem ha kaba la ïadonlang u Bah Thomas Passah, u Bah Mai Passah bad u Bah Wankhar.
“Naduh ka por ba la pynkha ïa ka KHNAM bad la khylliap haduh 10 snem bad hadien ba la pyrshang ban pynim biang ngam ju thrang bor bad ngam ju thrang ban long nongïalam bad dei tang hadien ba la mih ka kynrum kynram ha ka elekshon MDC ngam banse ban shim ïa ka rai namarba ban shong ruh jied jhieh, ban ieng ruh kynduh,” la pynshai u Bah Adelbert bad bynrap, yn leh aiu ïa ka post President, ïa ka party ngi lah ban pynkha bad ban pynïap hynrei ka jaidbynriew shisien ba ka la ïap ka la ïap.
“Ka 17 tarik kan dei ka sngi kaba khatduh ba ngin ïakren rangbah bad lada jia ba ka jingïakren kam poi shano shano ruh nga kyrpad ïa ki paidbah nongkyrshan jong ka North Shillong Constituency ba kin long kiba la pynkhreh,” la ong shuh shuh u Bah Adelbert uba la ïalam ïa ka KHNAM ba la ithuh da ka Election Commission of India (ECI).
“Bun tylli ki jingtyrwa kiba la wan sha nga ban ïaleh na kiwei pat ki party hynrei nga kwah ban kren da kaba shai ba ha ka 17 tarik kan dei ruh ka sngi kaba kut ban ïakren shaphang ki jingïakjia hapoh ka KHNAM,” u la ong.
Ïa ka KHNAM la seng ha u snem 2002 bad mynta kane ka seng saiñpyrthei trai ri ka la kynjoh sha ka jingïaid lynti kaba 20 snem.