Shillong, Jylliew, 14: Ka jingpluh jong kawei ka ing ha ka shnong Tyrsad ka la pynlong ïa kawei ka longkmie kaba dei ka nongkhaïi kynja ban shah kem ha ki Pulit hadien ba la ïoh kurup ïa u kynja palat 1,000 kilo na ka ingsah jong ka.
U Superintendent of Police ka East Khasi Hills district u Bah Sylvester Nongtnger ha u kyrwoh ba la phah sha ki lad pathai khubor u la ïathuh hadien ba la ïoh jingtip ïa ka jingpluh ïa ka ing ha Tyrsad mar mar ki Pulit ka tnat Fire and Emergency Service ki la leit sha kane ka shnong ban pynlip ïa kane ka ding kaba la sdang ban bamduh ïa ka iing baroh kawei.
“Hynrei ha ka jingtohkit ïa kane ka jingjia da ki Pulit bad ki nongtrei jong ka Mawngap Police Station, ha ka kamra kaba shapoh jong kane ka iing la lap ba la lum thup ïa u kynja,” ula ong.
Da ka jingïarap jong ki Pulit ka Anti-Narcotic Task Force (ANTF) la ïoh kurip haduh 1001.655 kilo u kynja na kane ka ing.
Ha kaba ïadei bad kane ka jingjia, ki Pulit ki la kem ïa ka Kong Junita Nongbet, 40 snem ka rta bad ïa ka case la rejistar ha Mawngap Police Station. Ïa kane ka longkmie ki Pulit ki la tian bishar ha kashari bad ka jingtohkit ka dang ïaid shakhmat ban ïohkem ïa kiwei pat kiba donkti ha kane ka kam ban khaïi ïa une u jingdih pynbu-aid.
