La ngi la jot ne rem ngin phai sha U Blei namar U khot ïa ngi da ka jingieit: Rev. RR Rapsang

Mawkyrwat, Lber 10 : Ki paidbah riewngeit na kylleng ki Balang hapoh jong ka Synod Sepngi bad na kiwei de ki Synod da ki lak ngut ki la wan sha ka jingïaseng paidbah ha ka Sngi U Trai 9 tarik u Lber, 2025 ha ka Balang Presbyterian Sakwang, Mawkyrwat Presbytery kaba long ka Jingïaseng jong ka Khasi Jaiñtia Presbyterian Synod Sepngi kaba 23 kaba la sdang naduh ka 6 haduh 9 tarik u Lber, 2025.
Lah ban kdew ba ïa ka jingïaseng paidbah ha kane ka sngi la pynïaid da u Rev. L.D. Nongsiej uba dei u Moderator jong ka Khasi Jaiñtia Presbyterian Synod Sepngi ha ryngkat ka jingsakhilang ki paidbah riew ngeit bad ki nongshah khot sngewbha ne ki Visitor.
U Rev. R.R. Rapsang haba ai jingkren na ka Ktien jong U Blei ha ka jingïaseng paidbah ha ka por 10:30 mynstep jong ka 9 tarik u Lber, 2025 u la pynshong nongrim da kaba sot ïa ki lynnong bad ki dkhot na ka Kitab U Hosia U Nongïathuhlypa kaba hynriew (6) bad ka dkhot ba nyngkong (1) kaba ong “Ale, ïa ngin ïa phai sha U Trai: namar U la tar, te Un pynkhiah ïa ngi; U la shoh, bad Un sop spain ïa ngi” bad na kane ka dkhot u la shim ruh ka phangpdeng kaba ong, “Wan phai noh sha U Blei”.
Lyngba katei ka phang pdeng, u Rev. R.R. Rapsang, u la kyntu ïa ki paidbah ba wan sha ka jingïaseng da kaba buh ïa ki kyntien, “To ngin phai sha U Blei, ngin nym sngewduh jingkyrmen la ngi la jngai, la ngi la jot ne ngi la rem hynrei U Blei U khot ïa ngi namar U Blei U ieit eh ïa ngi haduh katta katta bad pynkut ruh ïa ka jingïasyllok da kaba shim na ka kot jingrwai kaba 144 ka dkhot kaba 2 kaba ong, “To kynmaw ï’U Messaïah, Ha Kanaan ri b’la im; B’la shah ka beiñ ka shipa, ïa pha ban ïoh pynim. ïa U ba pha pynshitom, Haba ïa pha U wad; Wan phai, to ngeit, Ah Seïon! Balei phan bakla lad?”
U Rev. C.L. Laloo uba dei ruh u Moderator jong ka KJP Synod Mihngi haba kren na ka Ktien jong u Blei ha ka por 1:30 nohphai sngi u la shim da kaba pynshong nongrim na ka Kitab ki Salm kaba ar phew (20) bad ka dkhot kaba san (5) kaba ong, “Ngin leh risa ha ka jingpynim jong me bad ha ka kyrteng U Blei jong ngi ngin sieh ïa la ki lama: to U Trai Un pyndep ïa ka jingkyrpad jong me baroh” bad na kane ka dkhot u shim ïa ka phang kaba ong, “Ha ka kyrteng U Blei jong ngi ngin sieh ïa la ki lama”.
Shuh shuh na kane ka jingkren jong u Rev. C.L. Laloo u la ïa ki Lama ba kum ki khun khristan ki dei ban rah ha kine ki sngi kiba mynta, kawei na ki ka long ka Lama jong ka jingjop ha ki jingïaleh, ka Lama jong ka jingpynithuh ïa lade sha ka pyrthei bad ka Lama jong ka jinglaitluid.
Ha kane ka jingïaseng paidbah jong ka Khasi Jaiñtia Presbyterian Synod Sepngi kaba 23 ha ka Balang Presbyterian Sakwang ha ka jingïaseng por 10:30 mynstep la pule bad duwai da u Rev. S. Kharwaniang bad ki jingrwai kyrpang na Jingiaseng Khynnah Balang Sakwang, Standing Choir BSI Shillong Auxiliary, Standing Choir Mairang Presbytery bad Standing Choir Mawlai Presbytery.
Nangta, ha ka por 1:30 nohphai sngi, la pule bad duwai na u Rev. Anand Thapa bad ki jingrwia kyrpang na ka Balang Presbyterian New Nongstoin, Balang Presbyterian Sakwang, Standing Choir Mawkyrwat Presbytery, bad KJP Synod Sepngi Standing Choir.