Shillong, Jylliew :Ka Seng Samla Kshaid Youth Development Association (KYDA) jong ka shnong Kshaid ka ba hap hapoh ka Khatarshnong Laitkroh C&RD Block lyngba ka jingkyrshan pisa da ka sorkar lyngba ka ophis ka Planning, EKHD, ka la pynlong ïa ka workshop ka ba shi sngi kynthih halor ka phang; “Alcoholism and Drugs Abuses,” ha ka 11 tarik mynta u bnai hapoh ka ïing dorbar shnong Kshaid.
Ki ba la wan ïashim bynta ha kane ka prokram ki kynthup ïa ki dkhot jong ka Seng KYDA, ki khynnah skul bad nonghikai jong ka skul Kshaid Presbyterian UP SSA School, ki kynhun SHG ki ba hap hapoh ka jingkdup jong ka ïaid Shaphrang Village Organisation Kshaid, ki dkhot ka Village Defence Party (VDP), Kshaid, ki nongshong shnong kynthup na ka tnat Pulit jong ka Sohra Police Station.
ïa ka jingkren ba kongsan halor katei ka phang la ïoh na I Kong Vandana Diengdoh Sub Inspector napoh Sohra PS i ba la ban jur ba ki khun samla kim dei ban ngop ha ki jingdih ba sniew kum ka kyiad, u drok abd kiwei pat ki jait jingdih ki ba ktah ïa ka koit ka khiah bad ki ba long ruh ki nong pynjot bad ki nongshun ba shyrkhei tam jong u briew.
Nalor kata i la ban jur ruh ba ki samla ki dei ban kiar ruh na ka kam shongkha shongman khynnah (Early Marriage) namar kane ym tang ba ka ktah ïa ka koit ka khiah jong ki, hynrei ka ïalam sha ka jingduk jingkyrduh bad ha lyndet jong kane ka don ruh ka aiñ ka ba ki lah ban shah kem lada ki shongkha khlem pat biang ka rta.
Shuh shuh I la pynshai ruh ha ka ba ïadei bad ka phang ‘Cyber Crime’ ka ba ki khun samla ki dei ban long ki ba phikir bad husiar bha ha ba ki pyndonkam ïa ki social media kum ki facebook, instagram, whattsapp bad kiwei kiwei khnang ba kin lait na ki jingshah thok shah shukor bad ki jingeh ki ba ki lah ban ngat.
Ha ha kane ka jingïalang ba la pynïaid da u samla Banteilang Khongsit u ba dei ruh u president ka KYDA, la ïoh ruh ka jingkren na u Bah Charles Dohling Rangbah Shnong ka shnong Kshaid u ba la ai ka jingïaroh ia ka seng ka ba la lah ban pynlong ïa ka ba kum kane ka prokram halor ka phang ka ba donkam eh khamtam na ka bynta ki khun samla ha kine ki sngi ki por ki ba mynta.Kane ka long katkum u kyrwoh lyngba u Bah P.Diengdoh, General Secretary KYDA.
