Ngan ïasoh bad ka BJP tang lada ka Sorkar India ka pyntreikam ïa ka ILP: Adelbert

0

Shillong, Jylliew, 14: U MLA jong ka Khun Hynniewtrep National Awakening Movement (KHNAM) u Bah Adelbert Nongrum ha ka sngi Baar u la ong, ba ka jingpynbna jong u dang shen ban leit pynïasoh bad ka party BJP kan long tang lada ka Sorkar India ka kloi ban pyntreikam noh mardor ïa ka Inner Line Permit (ILP) bad ban pynbeit ïa u pud u sam hapdeng ka Jylla Meghalaya bad ka Jylla Assam.
Ha ka jingïakren bad ki lad pathai khubor u Bah Adelbert u la ong, “ngan pynïasoh bad ka BJP lada ka Sorkar India ka kloi ban pyntreikam ïa ka Inner Line Permit (ILP) kumba la pyntreikam tang da ki minit ïa ka ILP ha ka jylla Manipur hynrei balei kam lah leh kumjuh ha kane ka jylla Meghalaya.
“Nga la ïakren bad ki heh na Delhi, balei kim lah, ki dei ban lah. Lada ki lah ban pyndam noh ïa ka jylla Jammu & Kashmir tang da ki minit da kaba pyntreikam ïa ka Article 370 balei kim lah ban pynkut noh ïa ka jingïakajia pud,” u la ong.
“Ka dei ka Parliament kaba pynkha ïa ki Jylla bad kaba pynduh pyndam ïa ki Jylla,” u la ong.
“Lada phi lah ban pyntreikam ïa kine ki ar tylli ngan ïasoh sha ka BJP bad lada phim lah ngan ïai neh beit bad ka KHNAM bad ngan trei borbah ban wanrah ïa ki jingkylla,” u la ong.
Ka Ingdobar Thawaiñ ka la mynjur ïa ka Resolution ban pyntreikam ïa ka Inner Line Permit (ILP) ha u Nohprah, 2019 bad haduh mynta kane ka Resolution ka dang sahkut ha ka almari jong ka Ministry of Home Affairs kaba dang bishar bniah haduh katno ka jylla Meghalaya ka donkam ban pyntreikam ïa kane ka aiñ ka ban pyrkhing ïa ka rung ka mih laitluid jong ki briew kiba nabar ha ka jylla Meghalaya.
Haduh mynta ka Sorkar Meghalaya bad Assam hapoh ka jingïalam u Conrad Sangma bad u Himata Biswa Sarma ki la ïasoi ïa ka Memorandum of Understanding (MoU) ban pynkut noh ïa ka jingïakajia pud hapdeng ka Jylla Meghalaya bad ka Jylla Assam ha ka kylla kaba nyngkong.
Dang shen u Himanta Biswa Sarma u la ïathuh ba ka jingïapynbeit pud ha ka kylla kaba ar kan sa sdang la kumno kumno ha u bnai Jylliew ne Naitung mynta u snem.

Leave A Reply

Your email address will not be published.