Shillong, Rymphang 23: Ka khubor ba la ïoh na ki pulit la ïathuh ba u Lakhan Rishi na ka shnong Rishipara, Tura (WGH) u la phah ka jingujor pyrshah ïa uwei uba kyrteng u Nikesh Lohar ba u khlem ban siew bad shah bam ei ka pisa kaba la kot T. 10,040/-, kaba dei ka pisa ba u la sam ïa ki siar ba la sa sha u ha ka snem 2024.
Ha kawei pat ka jingjia ki pulit ki la ïathuh ba ka Prentina Marak ka la phah ka jingujor ba ha ka 19 tarik mynta u bnai ha ka por 6 baje mynstep, ka la shem ba ki runar bym lah ban ithuh ki la tuh ïa u khaw kaba la buh ha ka shnong Chandigre (WGH) bad kumba 243 byrni u khaw uba khia 50 kilo uba shongdor T. 4,14,300/- u la jah napoh ka godown jong ka.
Shuh shuh ki pulit ki la ïathuh ba ka la don ka jingujor hapoh ka Gasuapara PS (SGH) ba ha ka 11 tarik mynta u bnai, ba une uba ujor u la download kawei ka app ‘Candy Cash’, kaba dei ban shim ram kumba T.. 2,246/- bad kumjuh ruh u la aiti bad phah ïa baroh ki jnit ki jnat. Hynrei ha ka 18 tarik mynta u bnai u la ïohpdiang ka jingshah phone hapoh ka Whatsapp, kaba une uba phone u la kyntu ïa u nongujor ban siew ka pisa T. 3,747/-, bad lada um lah ban siew ïa kane utei uba phone u la byrngem ban phah ïa ki dur khlem akor ba la dep edit sha ka tnga jong u bad kiba shipara bad u.
