Mih ki nongtrei Sorkar ban leit sha ki Polling Station, 40 tylli ki PS ki bym shngaiñ ha EJH

Khliehriat, Rymphang 20: Ki kynhun jong ki nongtrei Sorkar naduh ka sngi Balang bad haduh ka janmiet sngi Palei ki la mih bad leit sha ki shnong bapher bapher ban pyndep ïa ki kamram kiba ïadei bad ka jingthep vote ha ki Polling Station na ka bynta kane ka elekshon sha Jaiñtia Hills Autonomous District Council.
U ADC jong ka East Jaiñtia Hills District Bah G.Warjri bad u Superintendent of Police ka East Jaiñtia Hills District, u Giri Prasad ki la iathuh ba ka jingpynkhreh na ka bynta ban pynlong ïa ka jingthep vote ka long kaba iaid beit iaid ryntih hapoh ka district.
“Ngi la ïaid shakhmat ha kaba ngi la don ïa ka Proper Eelection Managenent Plan hapoh ka district, ngi la phiah khatsan tylli ki Zone bad ar phynniew Sector, ngi la thung ïa ki Sector Officer bad ki Zonal Officer hapoh ka district ki don shiphew tylli ki Constituency kiba hap hapoh ka Jaiñtia Hills Autonomous District Council (JHADC). Na kine ki shiphew tylli kiba la wan thep kyrteng kum ki kyrtong ki don sawphew ar ngut ki kyrtong ha kaba laiphew phra ki dei ki shynrang bad saw ngut ki kynthei” ong u Bah G.Warjri.
Ha ki Polling Station kiba don hapoh ka East Jaiñtia Hills District ki nongthep vote ki don 55347 ki kynthei, 52862 ki shynrang bad don iwei i Transgender.
Ka ophis u Deputy Commissioner ka ladep ban ai jinghikai ïa baroh kiba hap ban leit pyndep ïa ki kamram sha ki Polling Station.
Ki don khatlai kynhun ki nongtrei Sorkar ba kynthup ki Pulit kiba la mih naduh ka sngi Balang namarba ki hap ban leit sha ki jaka kiba kham jngai bad ki hap ruh ban ïaid kjat haduh ban da poi sha Polling Station bad ha ka sngi Palei ki la don 155 tylli ki kynhun kiba la mih na Khliehriat bad baroh ki don haduh 168 tylli ki Polling Station kiba la mih na Khliehriat.
La sngewthuh ba ki 128 tylli ki Polling Station kin dei ki ban ïaid beit ha ka suk ka saiñ bad 40 tylli kin dei ki Polling Station ki bym da don jingshngaiñ kiba lah ban mih kano kano ka jingklumar.
Ka ophis u Deputy Commissioner ka la shim ruh sa kawei ka sienjam ha kaba ïadei bad ki Polling Station kiba don ha ki shnong ha khappud ha kaba ladep phah da ka jingthoh sha ki shipai Border Security Force ba kin iarap lem ïa ki Pulit bad ruh ba kan ym don ka jingshah pynwit jong ki kynhun kiba dei ban ïaid na ki lynti ha khappud.
U Bah Warjri u la bynrap shuh shuh, “don ki jaka ki bym pat don bording kumta ngi la ai da ki Emergency Light, ngi la pynlong ruh ka jingïalang bad ki Waheh Shnong ba kin iarap lem ïa ki kynhun ba kin ioh ïa ki jaka sah kiba biang kum ha ki skul ne kino kino ki jaka ba biang. Ka la don ruh ka jingïalang bad ki tnat Sorkar bapher bapher kum ka tnat pule puthi, ka tnat PHE, ka tnat bor ding, NRLM bad ki kynhun Self Help Group khnang ba lada ki kynhun ki poi sha ki shnong ki thaw ba kin ym don kano kano ka jingeh ha kaba ïadei bad ka thiah ka dem, ka bam ka dih bad kiwei kiwei ki jingdonkam.”
U Giri Prasad u la iathuh ba ka tnat Pulit ka la wanrah shuh shuh ar pyrton ki Pulit ban iarap ïa ki Pulit hapoh ka District bad kumjuh ruh ka tnat ka la ïatreilang bad ka ophis u Deputy Commissioner ha kaba la buh khatsan ngut ki Zonal Police Officer, bad ar phew hynñiew ngut ki Sector Officer ha ki jaka kiba lah ban mih ki jingkulmar.
U la ong ba ka tnat Pulit ka la buh uwei u Pulit lane u Home Guard bad ka shong ha ka jingdonkam ka jaka, lada dei ha ki jaka ba kham hajan la buh da ki Pulit Home Guard bad lada dei sha ki jaka kiba kham jngai la buh da ki Pulit jong ka district.
“Lehse ha ki jaka ba suba ban mih kano kano ka jingjia la buh ar ngut ki Pulit. Lehse ki don ki jaka kiba sha kyndong bad ki jaka ba khappud bad kiba kham jngai, ha kine ki jaka la buh shuh shuh ki Pulit namar ym lah ban tip ha ka elekshon ioh ka mih kano kano ka jingjia,” ula ong.
“Ngi la buh ruh ïa ki Quick Response Team bad la shna hynñiew tylli ki Quick Response Team ha ki jaka ba long pdeng khnang ba kin dup lah ban beh ban poi kham kloi lada don kano kano ka jingujor ban dup lah ban peit ïa ka shongsuk shongsaiñ,” ong u Prasad.
Ka ophis u Dc ryngkat bad ka tnat Pulit ki la shimkhia ba kito ki kynhun kiba leit sha ki Polling Station kin poi suk bad lada ki wan phai ruh kin wan phai suk, lehse kin don ki jaka ba hap iaid na Assam ruh na ka linag u SP bad u DC ki la dep iakren bad ka sorkar Assam bad la khmihlynti ba kan ym don kaei kaei ka ban wit bad la khimlynti ruh ba ka jingthep vote jong ki paidbah kan ïaid beit hapoh ka district.