Shillong, Rymphang 20: U Myntri Rangbah ka jylla u Conrad K Sangma u la ong ba ka jingkylla ha ka suiñbneng kam dei tang ka jingeh ha ka sawdong sawkun, hynrei kadei kaba donkam ban ïoh ka jingbishar kaba hok.
Haba kren ha ka prokram Climate Investments Coalition for the Global South ha New Delhi, u la ong ba kito kiba la noh synniang ha ka kam ba wanrah ka jingkylla ïa ka mariang ki dei kiba mad bha ïa ki jingeh bad kumta ka long kaba kongsan bha ban shim khia ïa kane ka bynta.
U la ong ba ka jylla Meghalaya ka la shim khia bha ha kaba ïadei kane ka kam jingkylla ka mariang. U la pyntip ruh ba ki la don ki lad ki lynti ba la shim da ki nongïalam shnong ban pynneh pynsah bad ban tyngkai haba ïadei bad ki kam jong ka mariang.
“Ki shnong ki thaw jong ngi kidei kiba ieid bha ïa ka mariang, ki tip kumno ban pynneh pynsah, ban ïada ïa ka mei mariang bad ki tyllong jong ka,” u la ong.
Haba kren shaphang ka jinglong ka bym thikna jong ka mariang, ka jingmih ki jingjia shah lynshop mariang kaba la ktah ïa ka jingim ki briew, u la kren ruh shaphang ka jinglah ban tihkna ïa ka jingwan jong u slap, ka jingkylla ka mariang kaba ktah ïa ka rep ka riang bad ka ïoh ka kot jong ki briew ha kaba ka jylla kam lah ban lait na kane.
“Ka jingkylla ka mariang ka la wanrah ka jingma ha ka ïoh ka kot bad ka jingneh ka roi ka san jong ka lawei kaba ïaid lang bad ki jingjia ba shisha jong ka Global South,” u la ong.
U la ong ruh ba ka Meghalaya ka dei kawei na ki jylla kaba pynneh ïa ki khlaw ki btap bad kadei ruh kawei kaba lamkhmat ha kaba ïadei bad kane bynta.
“Ngi la pyntreikam ïa ka programme kum ka Green Meghalaya, Payment for Ecosystem Services (PES) ban pynshlur ïa ki shnong ha kaba ïadei bad ka jingpynneh bad tyngkai ïa ki khlaw ki btap bad ka jingïada ïa ki tyllong um,” u la ong.
Haba kren shaphang ka jinglong kongsan jong ka jingïatreilang hapdeng ki jylla kane ka thaiñ shatei lammihngi haba phai sha ki kam ka mariang, u la ong ba ka jinglong kyrpang jong ka jinglong ka mariang ka la wanrah ruh ïa kiba bun ki jingshah ktah haba wan ka lyer bad u slap uba jur.
“Haba don ka jingjia shah lynshop mariang kaba jur ha Arunachal Pradesh ka lah ban ktah ïa ka jylla Assam, bad ka jingkiew ka wah ha Brahmaputra kan wanrah ïa ka jingshlei um ym tang ha Assam hynrei ha ki bynta ba shathie jong ka Meghalaya,” u la ong.
U la kren ruh halor ka jingdonkam ban ïatreilang bad ki ri ha South bad Southeast Asia, khamtam lyngba ka Bay of Bengal Initiative for Multi-Sectoral Technical and Economic Cooperation (BIMSTEC).
U la pyntip ruh halor ka jingpang bud rot kaba la ktah ïa ki jaka thung kwai ha Garo Hills bad Western Khasi Hills.
