Phi kynnoh bamsap ïa ka NPP phi pat VPP phi ai kaiphod ïa ka pisa ba phi khrong na ki paidbah? Khyrwit ki heh ka NPP

Shillong, Rymphang 18 : U Nongïalam ka NPP na Mawphlang constituency Bah Auspicious Lyngdoh Mawphlang ha ka Lah Sngi U Blei, ula ther tyngeh ïa ka Liang Pyrshah Voice of the People Party (VPP) namar ka jingbym lah ban sei ïa ki sakhi satar ban pynshisha ïa ki jingkynnoh bamsap pyrshah ïa ka Sorkar MDA ba ïalam da ka NPP. Kumjuh ruh u bah Egenstar Kurkalang u la ther da kaba ong ba ka VPP ka nang tang ban kynnoh ïa ka NPP ba ka bamsap katba ki nongïalam ka VPP haduh mynta kim pat ju ai kaiphod katno ki la ïoh lum ïa ka pisa da ki borti na ki paidbah ha ki por ba ki pynlong jingïalang mynshwa.
“Ka VPP bad ki Nongïalam jong ka kila ïai kynnoh ba ka Sorkar ba ïalam ka NPP ka dei kaba bamsap hynrei kine ki dei ki jingkynnoh ba khlem nongrim naba kim shym la lah ban sei ïa ki sakhi satar ban pynshisha ïa kine ki jingkynnoh” ong u Bah Auspicious haba kren ha ka rynsan ïalap elekshon ha ïew Pynursla ban pan jingkyrshan ïa ki kyrtong ka NPP-Kong Grace Mary Kharpuri na Nongshken bad Bah Rahboklang Tynsong na Langkyrdem-Laitkroh.
“Wat hapdeng kine ki jingkynnoh, ngim shym la ïohi ba ka VPP kala leit ujor wat tang kawei ka PIL ne ka ejahar pyrshah ïa kano kano ka tnad ne ki Myntri jong ka Sorkar MDA-I bad II. Kane ka long namar ba kim don ïa ki sakhi satar ban pynshisha ïa ki jingkynnoh pyrshah ïa ka Sorkar NPP kaba lah ban pynkut ba ki shu kwah kynnoh khlem nongrim” ula kynnoh.
Haba pynkynmaw ba ka People’s Democratic Front (PDF) kala leit ïasoh bad ka NPP halor ki kam ba bha jong kane ka Sorkar ba mynta, une u Nongïalam barim ka PDF ula ong “Ka VPP kala kynnoh ruh ba ka NPP kam dei satia kaba ïeng na ka bynta ka jaidbynriew hynrei nga kyrpad ïa phi ban bishar ïa ki kam babha jong ka party naduh ka por ba ka shimti ïa ka Sorkar ha u 2018”.
Ula ong “72 tylli ki snem kila ïaid, ka Congress, UDP, PDF ha ki manifesto ha ka por elekshon kila kular ba lada ki wan ha ka bor kin pynbeit ïa ka jingïakajia pud. Mano bala shim ïa ka rai ba satar ban pynbeit ïa ka jingïakajia pud ba kad Assam kaba la sahteng la slem slem bha, hato kam dei ka Sorkar NPP. Hynriew tylli ki jaka ba ïakajia pud na ki 12 tylli, la dep ban pynbeit mynta bad la ïasoi ruh ïa ka soskular hapdeng ka Meghalaya bad Assam ha ka jingïadonlang u Myntri kam Pohïing ka Ri ha Delhi, ha u snem 2022. Sa hynriew tylli yn sa pynbeit noh shen bad ka Meghalaya kan sa ïoh noh ïala u pud u sam uba thikna. Hato kam dei ka NPP kaba pynurlong ïa kane mynta”.
“Kumjuh ruh haba ïadei bad ka CAA, kaba ai long nongshong shnong ïa ki poi wir, ka dei ka NPP kaba ïalam ïa ka kynhun sha Delhi ban pyllait ïa ka Meghalaya na kane ka Aiñ. Haba kumta, mano ba ïeng na ka bynta ka Jaidbynriew, kam dei mo ka NPP?. Halor ka jingpynbna EIA 2020 ban pynjngai ïa ka khappud da 5 Km, hangne ruh ka dei ka NPP kaba la khang ban pyntreikam ïa kane ka jingpynbna ha Meghalaya. Ka dei ka NPP ka bym shym la rieh na ki jingkitkhlieh da kaba wanrah ïa ka resolution ban kyrpad ïa ka Sorkar Pdeng ban pyntreikam ïa ka ILP, pynrung ïa ka ktien Khasi. Hato kine kim dei kiba la leh na ka bynta ka Jaidbynriew” buh jingkylli u Bah Auspicious.
Ha kawei ka liang, u Bah Egenstar Kurkalang ula ong “Ka VPP ka triem eh tang ban kynnoh bamsap ïa kiwei hynrei kim (VPP) pat ju ai kaiphod satia ba haduh katno kila lum pisa na ki paidbah na man ki jingïa lang paidbah. Hato phi la ai kaiphod halor kane?. Ki tbit eh ban kynnoh watla ka Sorkar kala leh bha man ki kam kiba donkam da ki nongshong shnong la ka dei ka jingsam marbam, ki skhim, ka umbam umdih, surok bad kiwei kiwei”.
Haba pynpaw ba ka Pynursla kaba sakhi ïa ka jingwan bun bah ki kam pynroi ha kine ki 7 snem bala leit, ula ong “Ngim lah ban ïanujor ïa ka jingïoh kam pynroi mynta bad ki snem bala leit noh. Kumta, nga kyrpad ïa ki paidbah ba kim dei ban sngap ïa ka party kaba pnah tang ka ktien”.
Haba ñiew ïa ka VPP kum ka seng pyrshah Sorkar bad seng pyrshah kam pynroi, u Bah Egenstar ula ong ‘Wat hapdeng ki jingkam ba don bun ki professor bad ki stad ki jhad kum ki dkhot hynrei sngewsih ba ym pat ju don kawei ruh ka jingai jingmut jong kane ka party kaba la poi sha ka miej jong ka Sorkar. Kam shym la lah ban ai jingmut halor ka kam pule dangle,ka ïohkam ïohkam hynrei ki kloi pat ban ïahylla bad pynlong tamasa ha ki surok”.
“Khie leit bad kylli ïa ki paidbah jong ki saw tylli ki constituency, phin sa tip kumno ki (MLA ka VPP) kim kwah ban wanrah ïa ka roi ka par laitnoh tang ki jingïalam bakla bad jingkam thok. Kane ka pyni ba ka dei ka party ka bym tip shano ban leit. Ki kwah ban leh kat kaba ki sngewbit” ula bynrap.