OC Blue SPL 2024: Pynliem kput ka Lajong & Mawlai ïa ka Ryntih bad ïa ka Nongrim

Shillong, Rymphang 17: Ka Shillong Lajong FC ka la jop kput ïa ka Ryntih FC haba ka la pynliem ïa ka da 10-0 kol ha kawei naki jingïalehkai jong ka OC Blue Shillong Premier League 2024 ha madan First Ground – SSA Stadium, Polo, hynne ka sngi Nyngkong.
Hadien nangta ka Mawlai SC ka la ïoh ban khur ïala ka jong ka jingjop pyrshah ïa ka Nongrim Hills SC da 8-1 kol ha ka jingïalehkai kaba ar.
U Deibormame Tongper (8’, 22’, 24’, 29’, 46’, 53’, 57’) u la khyrwit hat trik ha baroh ar kylla da kaba pynkhihjar haduh hynñiew kol marwei ha kane ka jingïalehkai bad ka Ryntih kam shym la don jubab. Ka jingïoh thep kol jong u ka la kynjoh mynta sha ka 17 kol ha kane ka samoi bad u dei u rangïalehkai ba bun kol tam mynta, da kaba tam bun kol ïa u rangïalehkai ka Rangdajied United, u Owanijuh Pajuh, uba la ïoh thep 12 tylli ki kol mynta ka samoi.
Kiwei pat kiba la pynkhihjar na bynta ka Lajong ha katei ka jingïalehkai ki long u Riborlang L Lyngkhoi (36’, 61’minit) bad u Yohaan Benjamin (51’).
Kumban shu pynkynmaw, ka Ryntih ka la mad teng ïa ka namrem haka Mawlai haduh 10-1 kol hynrei mynta ka kynti ka jingïalehkai ka long kaba khlaiñ shiliang, ha kaba ka SLFC kam shym la kynduh than ïa ka jingma ha ka liang ba shadien lane ban shah pynma ha ka liang pyrshah.
Hadien kane, u Baiaikara u la kylla long u rangïalehkai ba lai jong ka Mawlai (bad uba hynñiew haba kyllumlang) ha kane ka samoi ban khyrwit ïa ka hat trik, da kaba pynkhihjar ha ka 39, 59 bad haka 60 minit. Saw ngut ki paralok jong u ruh ki la ïoh ban pynkhihjar ha kane ka jingïalehkai – kata u Damanbhalang Chyne (9’), Khrawkupar Jana (21’), Donlad Diengdoh (70’P) bad u Samlang Rympei (89’). Ka la don ruh ka kol kaba la kum thep hi da u Samborlang Sohtun (own goal) ha ka minit ba 64, katba ka shi kol jong ka Nongrim Hills la thep da u Banshemphang Kurbah (49’).
Ka resol kaba dap da ki kol kiba bun ha katei ka sngi ka mut ba ka Mawlai kan dang bat ïa ka kyrdan ba hakhlieh duh jong ka miej, bad mynta ka la ïoh kamai 35 poiñ. Ka Shillong Lajong, kaba la duh ïa ka kyrdan ba ar jong ka ha ka sngi Saitjaiñ ha ka Rangdajied United FC, ka la knieh biang ïa ka jaka ban wan biang ha ka kyrdan ba ar. Baroh arliang ki ïaryngkat da mar 32 poiñ hynrei ka Lajong ka don ïa ka rekod kaba kham ha ki jingïakhun ba ki ïakynduh pyrshah (head-to-head), bad ka jingïapher kol (goal difference) kaba kham bha nalor ba ka dang sah sa kawei ka jingïalehkai ban ïaryngkat bad ka Rangdajied United FC.
Mynta ka sngi ka Rangdajied kan aireng pyrshah ïa ka Laitkor SC ha ka por 11 baje mynstep bud sa ka jingïalehkai hapdeng ka Langsning FC bad ka Sawmer SC ha ka por 3 baje nohphai sngi.