Lada nga jop ïa kane ka MDC ngan shong ha JHADC kum u kyrtong khlem seng :Marshall Biam

Khliehriat Rymphang 15: U kyrtong khlem seng uba ïakhun ïa ka election MDC sha Jaiñtia Hills Autonomous District Council na ka Bataw Lakadong Constituency, ha ka shap jong ka Wait, u bah Marshall Biam, ha ka jingleit ialap election jong u sha ki shnong bapher bapher u la pynpaw ba u don shisha ka jingangnud ban ai ka jingshakri kaba paka ïa ki paidbah ban wanrah ïa ka roi ka kiew ha ka thaiñ bad u la bynrap ruh ba lada u jop ïa kane ka election un nym leit ban pyniasoh ïalade bad kano kano ka party hynrei un shong ha JHADC kum u MDC ba khlem seng.
“Ai ba kiwei kiwei ki party kin kren kin kynnoh ïa nga ngam lei lei namar nga tip ba phi don ma phi u paidbah bad nga kumta ngam don jingtieng tang khyndiat ruh, ki jingeh ha ki shnong ki thaw nga tip bha ba na ka por sha ka por wat tang ka bor ding electric ruh ym ju ioh, kane ka paw haduh katno ka jingshah dien ka constituency bad ym pat ju don ruh ki nongïalam ki ban kren ïa kata ka bha ka miat, ka iap ka im jong phi ki nongshong shnong ha JHADC” ong u bah Marshall ha ka jingialang ha shnong Hingaria.
U bah Marshall u la kyrpad ïa ki paidbah nongkyrshan ba kin buh ha ki jingdwai ha u Blei ba un dup poi sha ka thong ba un dup lah ban rah ïa ki mat ban iakren ha ka Council jong ka Jaiñtia Hills Autonomous District Council “Dwai ba ngan jop, ngan kren beit ïa ki mat ban kyntiew ïa ka constituency, ka jingjop jong nga kan dei ka jingjop jong phi ki paidbah, nga wan na ka longïing kaba duk, phi ki paidbah phi tip ïa kata, hynrei ngan nym shong kli kti ha kaba ngan nym ailad ïa ki heh spah, ki heh saipan ba kin ïa tur thma bad phi, ka mynsiem jong nga ka rhem, ngan ïakhun ïa kane ka kam katba dang im na ka bynta jong phi ki paidbah watla nga dei ban shong along ruh ngam khuslai ïa kata”
U la pynpaw ruh ba ka mat kaba hakhmat eh lada u ioh ban shong kum u MDC ha JHADC ka long ban ïakhun ban pyn register ne phah register ïa ki kyrteng ki jaka jong ki briew kiba shong ha ki shnong ba khappud bad ka Bangladesh ba kin register ha ka kyrteng jong ki hi kiba dei ki nongshong shnong namar ioh ba ki wan ki khwan myntoi ioh kin thom bor ïa ki paidbah ha kaba kum u briew uba ju trei na ka bynta ki paidbah un nym lah shah ban shu peitkai ïa kata “Lada ioh ban register ïa ki jaka, kita kiban wan ban leh ïa ka kam kiba na JHADC ruh kim dei ban pan pisa na ki paidbah na kine ki shong ba khappud bad lada ngan long kum u nongmihkhmat ngan nym ailad, ïa ka bamsap ngan pynduh pyndam” ong u bah Marshall.
Ha ki jingialap election jong utei u kyrtong shimet u la kren ruh da kaba shai ba un trei bha ïa ka kam bad shim khia ban wanrah ïa ka roi ka kiew ha ka thaiñ bad ki paidbah kiba bun kiba la ai ka jingkyrshan kaba pura ïa u bah Marshall, kiba na ki shnong ba khappud bad ka ri Bangladesh, kum na shnong Hingaria, Huroi, Lejri, Bataw bad kiwei kiwei ki shnong ki la pynpaw ka jingsngew kmen bad phai khmat sha u bah Marshall da ka jingkyrmen ruh ba un poi sha ka thong.