Sngewieid ban tip ïa ka jingshisha halor ka jingphet seng Congress jong U bah Prestone Tynsong, ha u snem 2018 bad ka daw jong katei ka jingphet seng jong utei u rangbah, ka dei pleng, tang na ka jingkynriah ïa kawei ka Block ophis na Wapung sha Lumshnong, kaba la rai da U Mukul Sangma, Myntri Rangbah barim ka jylla, ha katei ka por.
Lyngba katei ka jingkren, ka la shai kdar mynta ka sien, ha kaba ka jingphet seng Congress jong U Bah Prestone Tynsong, kam dei pleng na ka daw jong ka jing ijli jong u ïa katei ka seng, hynrei ka dei ka daw shimet jong u bad U Mukul Sangma bad lada ka long na katei ka daw, ka pyn pyrkhat lehse ïa uba bun ïa ka kyrdan nongïalam jong utei u rangbah, ha kaba tang na katei ka jingïapher jingmut shimet bad u Myntri Rangbah, ula phet noh bak, na ka seng, kaba la pynheh pynsan ïa u bad kaba la pynjop elekshon ïa u ruh ha ka sien nyngkong, ha u snem 2003.
Ka long ruh kaba lyngngoh ba ha katei ka sien, utei u nongïalam barim jong ka seng Congress, um shym la kren eiei ruh em, ïa katei ka ishu, hynrei u thad madan ha ryngkat bad U Conrad Sangma, u heh duh jong ka NPP, ba katei ka sorkar, ka dei ka sorkar kaba bamsap tam ha ka ri India hi baroh kawei.
Mynta haba utei u rangbah, ula sei madan ïa ka daw, ka la dei ruh ba u paidlang ka jylla, khamtam ïa ka Constituency, kaba u mihkhmat, ba kin thew tarajur bha, la ka jingphet seng, ka ïahab ne em, tang na ka daw jong uwei u briew bad nangta, la ka jingphet seng, ka ïahab ne em, tang na ka daw jong ka jingkynriah ïa iwei i ophis Block bad ngi la nang mut, ba ki don da kiwei ki daw, kum ka ishu bamsap ïa ka sorkar jong U Mukul Sangma, lane ka jingleh shiliang jong U Sangma, ha kaba ïadei bad ki kam kiba ktah ïa ka jaitbynriew Khasi baroh lang.
Ka jingkren jong U Bah Tynsong, ka la long ka sakhi kaba biang bha bad ka ban sah kynmaw; hynrei katba ka jia ngin khmih lynti, ba un nym phet noh, sa na ka seng NPP bad ba lada u phet ruh, un kren ïa ka jingshisha bad ba um dei ban tieng ïap bad ban sa sei madan ïa ka daw, hadien 7 snem, kumba ula leh ïa U Mukul Sangma.
Ha kajuh ka por, lada ka jingkynriah ïa ka ophis Block na Wapung sha Lumshnong, hynrei ka wan pat sa ka jingkynriah kaba mynta ïa ka Medical College, ka jingkynriah ïa ka University bad sa bun bah ki skhim pynroi kiba la kit da ka sorkar U Conrad Sangma, sha Garo hills, ki la long ne em ki daw kiba U Bah Tynsong, un hap ban peit bniah bha ïalade, ha ka jingïadei jong u bad kane ka seng NPP? Ne yn dang ap sa ïa kiwei pat ki daw ba dang bun ki bym pat sei madan haduh mynta mynne, kane kaba ki paidbah ki donkam ban kylli ha kane ka por kaba mynta, khamtam ha shwa ba kin leit thep vote thymmai sha ka ADC.
