Shillong, Rymphang 13: U Myntri ka sorkar jylla u Marcuise N Marak ha ka sngi Palei u la ong ba kam don ka jingpyrshang ïa ka kynhun lehnoh kaba la shah kheiñ beaiñ ka Garo National Liberation Army (GNLA) ba kan khie im biang hapoh ka thaiñ Garo Hills jong ka jylla.
Haba kren sha ki lad pathai khubor u Marak u la ong, “Em kam don satia kum kata ka khubor. Ki shu don tang ki hamsaïa ba la ong ba ka don ka jingthmu ban pynkhie im ïa ka GNLA hynrei ka jingshisha kam don satia kum kata.”
Une u nongmihkhmat na Williamnagar u la kam ruh ba kan long kaba suk satia ïa kane ka seng lehnoh ba kan khie im biang ha kum kane ka por khamtam ha ka thaiñ Garo Hills bad ong, “Mynta ki surok ki la poi lut sha baroh ki shnong jong ka thaiñ. Ha ka por ba dang don ka seng GNLA bad ANVC ha ki 7 snem ba la leit noh la ïohi ba kam don satia ka jingpynbiang ïa ki surok ki lynti synkien. Ban jam sha ka wah Simsang ka long kaba eh bha naba phi hap ban shong da ka lieng ha kaba ki lehnoh ki ïoh ban shim kabu hynrei mynta lada phi leit sha shilliang jong ka wah Simsang ki la don bun ki surok bad kumta kam don shuh ka lad ban pynkhie im biang ïa ki kam lehnoh.”
Haba kyntait ïa ka jingong jong u chairman barim ka seng lehnoh kaba la shah kheiñ beaiñ ka ANVC.B bad mynta u MDC ka BJP na Tura u Bernard N Marak halor ka jingpulom jong ka sorkar ha kaba ïadei bad ki jingai jingïarap kaba la pynïar sha ka kane ka kynhun u Marak u la ong, “Kino kino ki bym sngewhun aiba kin wan shakhmat. Kam shym don satia ka fullstop halor kane ka bynta. Aiba kin wan shakhmat ban ïakren bad ka sorkar. Ngi lah ban ïasyllok bad ka sorkar kan wad ïa ki lad ki lynti ha kaba ïadei bad kane ka kam. Nga don barabor bad ki paidbah bad kumjuh ruh bad ki samla ha kano kano ka por ba ki kwah ban ïakren.”
“Lyngba ka CM Elevate, ki paidbah ki don bun ki lad ha kaba katto katne ki la ïoh ïa ki home stay, hotel bad kiwei pat ki lad jingïarap na ka sorkar. Ki la don ruh katto katne kiba la register ïa ki kam contract. Nga ruh nga dang pyrshang katba lah ban ïarap ïa ki. Wat ki ophisar ruh ki la ïarap ïa ki,” u la ong da kaba bynrap, “Nga tharai ba kim don shuh ki samla kiba kwah ban leit phai biang sha ka jinglong kaba rim sha khlaw.”
U Myntri ka sorkar u la pyntip ruh ïa kiba bun ki prokram ba la wanrah da ka sorkar na ka bynta ban pynïoh kam ïa ki samla khlem kam khlem jam ha kane thaiñ.
“Ngi la pynsngewthuh ïa ki samla halor ki kam thep kam pulit bad bun na ki, ki la ïashim bynta. Ngi donkam ban pynsngewthuh ba ki dei ban ïashim bynta ha ka DSC examination. Ki don ki MCS/MPS officer kiba long kiba kloi ban ïarap ïa ki samla ha kaba ïadei bad ka jingïohkam ïohjam,” bynrap u Marak.
