Nongpoh, Rymphang 13: U Prof. G.D. Sharma, Vice Chancellor ka University of Science and Technology Meghalaya (USTM) bad uba dei ruh u President barim ka Association of Indian Universities, u la ïoh pdiang ïa kawei na ka khusnam ba al tip kum ka “Outstanding Vice Chancellor in India” ba la ithuh kyrpang ïa u da ka Indian Education Network.
Ïa kane ka khusnam la sam ha ka 12 tarik u Rymphang 2025 ha ka 14th India Education Summit 2025, ha Nongbah Delhi, kaba ki la ai ïa kane ka khusnam kum ka jingithuh halor ki kam nongïalam, ka jinglen lade bad ban wan rah ïa ka jingtreikam kaba kyntiew ïa ka pule ka puthi hapoh ka ri India.
U Prof. G.D Sharma u la ong ruh uwei na u nongshim bynta bad ai jingkren ha katei ka jingïalang ba la tip kum ka 14th India Education Summit 2025, ha kaba la ïa don lang u Prof. T.G. Sitaram, Chairman AICTE; Dr. Harivansh Chaturvedi, Director General ka IILM and Alternate President ka EPSI; Dr. Vijendra; Dr. Vikas Jain; bad ruh kumba 100 ngut ki Vice Chancellors, Directors bad kiwei kiwei de.
Haba kren ha kane ka jingïalang bah ki Vice chancellor, u Prof. Sharma, u la kren halor ki lad ki lynti ban saindur ne ban wan rah ka jingkylla lyngba ka pule ka puthi ban ai kam ai jam ïa ki khun samla ki jylla shatei lam mihngi ka ri India. U la ban khia ruh ba ka USTM kum kum kawei ka skulbah kaba la ïoh ïa ka kyrdan ‘A’ grade NAAC- ka la thaw ïa ki lad ki lynti ban phai khmat kyrpang sha ki samla ban dang kyntiew ïa ka jingnang jingstad, ban tbit ha kino kino ki kam bad ruh ban wad ïa ki lad ki lynti ba ki samla ki dei ban long kita ki samla kiba lah ban ieng ha la ki jong ki kjat lyngba ki prokram bapher bapher ba la wan rah da ka skulbah USTM.
