Pynshongshit ka ïakob rang bad thei bhabriew ha ka tamasa Tlang jong ka SSS Laitkor Pyllun
Shillong, Rymphang 10 : Ka Seng Samla Shnong Laitkor Pyllun ryngkat ka jingkyrshan lang jong ka JM Foundation ka la pynlong ïa ka Tamasa Tlang 2025 Mr bad Miss Laitkor 2025 ha ka 8th Rymphang 2025 ha madan Laitkor Pyllun ha kaba la ïashim bynta shitrhem da ki samla jong ka shnong Laitkor Pyllun.
Ha kane ka Tamasa Tlang 2025 ka la don ka ïakob shad bad ïakob rwai na ka bynta ki khynnah bad samla jong ka shnong Laitkor bad la wan ban pynshongshit shuh shuh ïa katei ka Tamasa Tlang da ki tyngshop bad ki puron na ka kynhun jong ka Shillong Artist bad kumjuh da ka jingtem pynshongshit na u Dj Baby Smit.
Kaba pynshongkun ïa katei ka Tamasa Tlang ka dei ka Mr & Miss Laitkor 2025 ha kaba la ïashim bynta da ki 10 ngut ki Rangkynsai bad 10 ngut ki Theibhabriew jong ka shnong Laitkor bad ki nongjop ha katei ka jingïakop kin long ki nongrahktien jong ka jingkhuid jingsuba (Green Ambassador) jong ka shnong Laitkor.
Ha katei ka prokram la wan ban ïadonlang da ki Rangbah Shnong bad Secretary jong ka shnong Laitkor kaba kynthup ïa i Bah Kitbor Kharkongor Chaiman Laitkor Dorbar Pyllun, Bah Mangkara Kharkongor, Rangbah Shnong Laitkor Nongdaneng ryngkat ka jingïadonlang i Bah Johnystar Mawrie Chief Adviser Seng Samla Shnong Laitkor Pyllun bad ka jingsakhi lang da ki hajar ngut ki paidbah nongshong shnong jong ka shnong Laitkor.
La pynkut ïa katei ka sngi da ka jingsam khusnam da ki pansngiat, riam tynrai, ki syrnod bad ka song pisa sha baroh ki nongjop ha ka Mr & Miss Laitkor 2025.
Ki nongjop ha ka Mr & Miss Laitkor 2025 ki kynthup ïa u Kerrette Kurbah, ba wan ba ar bad ba lai pat la ïoh da u Davio Pohshna bad u Badondor Marbaniang. Ia ka khusnam Mr Perfect Ten 2025 la ïoh da u Badondor Marbaniang bad Mr Hunk 2025 da u Kerette Kurbah katba ïa ka khusnam Mr Congeniality 2025 la ïoh da u Elias Kharnaior
Ha ka liang ki samla kynthei pat ïa ka nam lahduh la ïoh da ka Hafica Pohshna katba ïa ka khusnam ba nyngkong bad ba ar la ïoh da ka Marvinia Kurbah bad Annie Bansara Kharkongor. Katba ïa ka khusnam Miss Perfect Ten 2025 la ïoh da ka samla Hafica Pohshna, Miss Hunk 2025 da ka samla Annie Bansara Kharkongor bad ïa ka khusnam Miss Congeniality 2025 da ka samla Thericia Lyngdoh
Kane ka long katkum ka kyrwoh ba la phah da u Samla Michael Wanshong President Seng Samla Shnong Laitkor Pyllun.