Buh kyndon bad khang pyrshah ka DS Pamrapaithlu ïa ki kyrtong ban rung ban mih hapoh shnong

Khliehriat, Rymphang 10: U Waheh Shnong jong ka shnong Pamrapaithlu, East Jaiñtia Hills District, u bah L.Rymbai, la ong ba ka Dorbar Shnong ka la dep shong da ka Executive Committee ha kane ka sngi Nyngkong bad ka la shim ruh ia ka rai ban buh ïa ki aiñ bad ki kyndon bapher bapher na ka bynta kane ka MDC Election sha Jaiñtia Hills Autonomous District Council.
La ong ruh ba da kawei ka sur ha ka jingïalang la rai ban khang pyrshah ïa ki kyrtong ïakhun election bad ki briew jong ki ban rung ban mih hapoh shnong ha kaba ïadei bad kano kano ka kam MDC sha JHADC.
La iathuh ba ka daw bad ka jingthmu jong ka Dorbar shnong haba shim ïa kane ka rai ka long na ka bynta ban khanglad bad ban tehlakam ïa ki kam shongshit election bad ruh ban wanrah ïa ka shongsuk shongsaiñ ha shnong ha thaw hi baroh kawei.
Nalorkata, ka Executive Committee jong ka shnong Pamrapaithlu ka la buh ruh da ki kyndon ba kino kino ki kyrtong ïakhun election ne ki briew jong ki kyrtong kiba kwah ban kynduh ïa ki nongshongshnong ki lah ban ïa phone shwa bad ki briew jong ki kiba dei ki trai shnong.
“Kane kam shym mut satia ban khanglad ïa ka sngi ne ka tarik ba kin pynlong ïa ka jingialap election jong ki, hynrei tang ha ki sngi bym don ka jingialng ialap election ne ka campaign” ong u kyrwoh.
“Ka Dorbar Shnong Pamrapaithlu ka ai laitluid ïa baroh ki nongshong shnong ba kin jied ne thep ïa ki vote jong ki ïa u/ka kyrtong ba ki mon”
La ong ba kane ka hukum, ne aiñ bad kine ki kyndon kin treikam noh mardor hi naduh mynta ka sngi ka 10 tarik Rymphang 2025 tat haduh ban da kut kane ka election MDC kata haduh 21 tarik Rymphang 2025.
Kum ban shu pynkynmaw ba ka shnong Pamrapaithlu ka hap ha ka 22- Musiang Rangad Constituency ha ka MDC Elcetion sha ka Jaiñtia Hills Autonomous District Council.