Pynkhreh ka sorkar ban thung kham bun ki doktor specialist ban shakri ïa ki paidbah ka jylla

Shillong, Rymphang 05 : Ka myntri ka tnad ka Koit ka Khiah, Dr. M Ampareen Lyngdoh ha ka sngi Balang ka la pyntip ba ka sorkar kan dang thung shuh kham bun ki doktor specialist da kaba ong ruh ba ha ki san bad hynriew snem nangne shakhmat ka Meghalaya kan ym mad shuh ïa ka jingkyrduh doktor hadien ba ka Shillong bad Tura Medical College ki la sdang ban treikam.
Haba ïakren bad ki lad pathai khubor hadien ka jingïalang bad ki ophisar ka tnad, ka Myntri ka la ong, “Ngi don ha ka kam bad ynda baroh ki kam ki la ïaid beit ïaid beit ryntih, ngin sa nang thung shuh shuh ïa ki specialist.”
Shuh shuh ka la ïathuh ba ïa kane ka kam la dep ruh ban kren bad u Myntri Rangbah ka Jylla Conrad K Sangma na bynta ban ïoh ïa ka jingmang pisa na ka bynta ka jingthung kam contractual.
Ka Myntri ka la ïathuh ruh ba ka kynhun myntri ka la wanrah katto katne ki rai (notification) kiba donkam ban bishar bniah. Ka la ai nuska ruh ba ym lah shuh ban thung kam ha ki katto katne ki kyrdan jong ki nongtrei khlem da ïoh shwa ïa ka jingmynjur na ka kynhun myntri. Kumta kum ka tnad kan ym lah ban leh ei ei lait noh da kaba thung contractual na bynta ki katto katne ki jingsumar ba donkam ïa ki specialist.
“Kine ki lah ban kynthup ym dei eh tang ïa ki doktor hynrei wat ïa kito kiba trei ha ki lab kum ki technician, nangta ki nurse bad baroh. Namar lada thmu ban thung ïa ki ha ka dur jong ka contractual, donkam ruh ban pyrkhat bha ïa ki bad dei na kane ka daw ngi hap ban pyrkhat lut ïa kata baroh,” ka la ong.
Da kaba pynpaw ba shen ki medical college jong ka jylla kin sa sdang noh, ka Myntri ka la ong ruh ba ka Meghalaya hadien kane kan ym mad shuh ïa ka jingkyrduh doktor ha ki hynriew snem shadien.
Haba jubab halor ka jingkylli, ka Myntri ka la ïathuh ruh ba ki doktor ba leit pule na ka bhah sorkar ki dei ban wanphai bad shakri ïa ki paidbah ka jylla bad kumta na ka liang ka sorkar ka dang neh ïa kata ka nongrim khlem pat kylla.
La ïathuh ruh ba mynta ka sorkar kam ïateh tang bad ka Chennai na ka bynta ban pyntbit ïa ki doktor hynrei ka la ïateh ruh bad kiwei ki jaka treikam. Ka la ïathuh ba ki la ïateh ruh bad ka Apollo na ka bynta ki katto katne ki jait jingsumar nalor kiwei kiwei.