Lah ban shah mait long MLA u Benedic ha ka Dorbar Synrai

Shillong, Jylliew 12 : Kat kum ka khubor ba la ïoh la ïathuh ba hapoh kine ki khyndiat sngi ban wan ka National People’s Party (NPP) kan sa ai ka jingujor sha u Lamphang ka ïing Dorbar Thawaiñ Assembly u bah Metbah Lyngdoh pyrshah ïa u MLA jongka na Raksamgre Constituency u Benedic R Marak halor ki kam pyrshah party jongu. Ka jingujor sha u Lamphang kan long ban mait noh ïa ka jinglong MLA jongu.
Khlem pep na ka liang u Lamphang un hap ban ïaid kat kum ki kyndon aiñ ban mait beit ïa ka jinglong MLA u Benedic namar ka jingujor ka wan na ka party bad ka long halor ki kam pyrshah party bad jingthmu jongu ban pynkhyllem ïa ka sorkar MDA da kaba ula pyrshang ruh ban khroh ban kjor ïa ki MLA ka NPP ban leit pynïasoh noh sha kawei pat ka party.
Dang haka Sngi Saitjaiñ ha ka jingïalang ba la long ha Tikrikilla u Myntri Rangbah ula pynpaw ba ka party ka la aiti ïa kam pyrshah party jong u Benedic ha ka Disciplinary Committee jongka Party ba kan leh ïa kaba donkam kat kum ki kyndon pynïaid party. U Benedic u la sdang ïa ki kam pyrshah party jongu naduh ka por ba ka party ka hukum ïa u ban hiar noh na ka shuki CEM ha GHADC hynrei u khlem treh ban hiar namar u pan ka jingkyrshan na ki MDC ka TMC hynrei wat la ki kyrshan ïa u ruh u khlem jop hi ha ka election jied CEM thymmai kaba la long ha u Kyllalyngkot mynta u snem.
Na ka liang u Myntri Rangbah ula dep pynbna ha ka Sngi Saitjaiñ ha katei ka jingïalang ha Tikrikilla ba ka NPP kan pynduh tiket ïa u Benedic wat la u dei u MLA jongka na Raksamgre bad kan ai noh ïa u MLA ba rim jongka Congress u Limison D Sangma.
Na ka liang u Myntri Rangbah ula ïathuh ba u Benedic ula pyshang ruh ban pynkhyllem ïa ka sorkar MDA da kaba pyrshang ban khring ïa ki MLA na ri lum Garo ban leit pynïasoh noh sha kiwei pat ki party. Nalor kata ula kynnoh ïa u Myntri Rangbah ba u dei ma u uba wanrah ïa ki kynrum kynram ha GHADC.
“ Na ka liang jong ka sorkar jong nga ngi dang pyrshang ban ïatrei lang bad ka GHADC ban thaw lad kumno ban ïoh siew ïa ka tulop ki nongtrei hynrei na ka liang jongu Benedic pat u kynnoh pynban ïa nga bad u pyrshang ban pynpait pynpra ïa ki MLA na ri lum Garo ban khyllem ïa ka sorkar MDA. U la pyrshang ban leit ïakynduh ïa ki MLA bad MDC jongka NPP bad kular ban ai ïa ki da ki shuki kiba heh lada ki wan ban ïasnoh kti lang ban thaw ïa ka sorkar kaba thymmai. Um tip ba kita ki briew kiba u leit ïa kren ki wan bad ïathuh lut ha nga baroh ïa kiei kiei kiba u la leh” ïathuh u Myntri Rangbah ha katei ka jingïalang paidbah.
“ Nga la ong ïa u ba un kylla ba mut bad ngin ailad ba un ïai bteng kum u CEM hynrei u pat um sngap ïa kane u ïai bteng ban leh ïa ki kam pyrshah party bad pynkhih sorkar bad kumta ym banse ban ai jingsneng ïa u kat kum ki kyndon jongka party” ong biang u Myntri Rangbah.
U Myntri Rangbah ula ïathuh ba ki don ki sabut kiba biang pyrshah ïa u Benedic ïa kita ki kam pyrshah party jongu namar ki MLA hi ki long ki sakhi bad lada um lah ban pynshai ban pynshisha halor ki jingkynnoh khlem pep un ngat ha ka Anti Defection Law bad shah mait ka jinglong MLA nalor ba un duh ban ïaleh election haduh 6 snem lynter.