Wat pynbor ïa ngi ban sah miet khlem pud sngi ha surok, maham ka FASToM ïa ka Sorkar

Shillong, Jylliew, 12: Ka Federation of All School Teachers of Meghalaya (FASToM) ha ka sngi u Blei ka la phah da ka jingthoh sha u Myntri Rangbah ka Jylla u Conrad Kongkal Sangma halor ka jingbym pat lah ban pynurlong ïa ki jingdawa ban kyntiew tulop ïa ki nonghikai skul Adhoc kiba don ha ka jylla baroh kawei.
Ka jingap khmihlynti jong ki nonghikai skul Adhoc ka la kynjoh mynta la shi bnai kynthih hadien ba u Myntri Rangbah ka Jylla u la pynkohnguh ïa ki nongïaam nongïalam jong ka Seng ba kin ïai ap la kumno kumno na bynta lai tylli ki jingïalang Kynhun Myntri na ka bynta ban ïathir bad ban ïatai sani halor ka jingpynkiew tulop ïa ki nonghikai skul Adhoc.
“Ka jingeh kam dei ha ki nonghikai Adhoc hynrei ka shong ha ki briew kiba don hapoh ka Sorkar kumno ban trei,” ong u Nongaiktien ka FASToM ha ka dorkhas ba la phah sha u Myntri Rangbah haba kynthoh halor ka jingpyni daw jong u Myntri Rangbah dang ha kine ki khyndiat sngi ha kaba ïadei bad ka jingdawa jong ki nonghikai skul Adhoc.
Ka Seng ka la kynthoh ruh halor ka jingong jong u Myntri Rangbah sha ki lad pathai khubor ha ka 9 tarik mynta u bnai ba ka Sorkar kan hap ban khlong bad khate ïa ka pisa na kiwei ki tnat treikam ka Sorkar ban siew tulop ïa ki nonghikai skul lada mynjur ïa ka jingpynkiew tulop.
“Ban khate ïa ka mang pisa na kiwei pat ki tnat treikam bad ban pynphai biang ïa ka T.5240.32 klur sha ka Sorkar Pdeng namar ka jingbym lah jong ka Sorkar Jylla ban pynbiang ïa ka Utilisation Certificate ka dei ka jingkitkhlieh hi jong ka Sorkar bad ki briew kiba trei ha ki tnat treikam bapher bapher jong ka Sorkar bad ïa kita ki jingeh ym lah ban shu pynkit ha ka hok ba la shah kyntait jong ki nonghikai skul Adhoc ka jylla, kaba dei ka jingpynkiew ïa ka tulop kaba ki la ap khmihlynti la hynriew snem kynthih,” la ong une u Nongaiktien ka FASToM.
“Namarkata, katba ngi dang ap ïa ka jingïalang balai jong ka Kynhun Myntri, ai ba ma ngi ki nonghikai bad ka Sorkar ngin ïa burom markylliang ïa ka kam kaba ngi trei ba la bynshet ha ngi. Ngi dei ki nonghikai skul ym ki nongïakhih sha surok. Ka kam jong ngi ka long ban ai jinghikai, ban tei ïa ka ri, ban pynkhreh ïa ki khynnah skul ban long kiba riewkhraw kumba long ma phi (ki Politishian),” u la ong.
“Myntri Rangbah bad ki Myntri Sorkar, ngi dang don ka jingkyrmen bad ngi dawai ba ki sngi ki ban dang wan kin long kiba bha. Hynrei ngi la thait. Ka jingïaishah jong ngi kam don shuh. Ha ka sngi ba la pynlong ïa ka jingïalang Kynhun Myntri kaba lai, ngin shad da ka jingkmen lane ngin pynkhreh ban pynlong da ka jingduhthiah kaba khlem pud sngi ha surok kumba ngi la kren ha ka 12 tarik, Jymmang, 2022,” la maham une u nongïalam ka FASToM.
“Ngi kyrmen ba ka Sorkar MDA, kan pynbeit ïa la ki jingbakla ïa ki jingduna, bad ban don ïa ki briew kiba trei shitom bad ban pynthikna ba sa T.5240.32 klur kam dei ban leit phai biang ka Sorkar Pdeng hynrei ban pynbeit noh ïa kane ka jingeh kaba rit jong ki nonghikai skul Adhoc na ka bynta lai snem ïa kaba u Myntri Rangbah badonburom ka Jylla Meghalaya u la kren ha ka jingïalang ha madan Malki ha u snem 2019,” u la ong shuh shuh.
“Ngi kyrmen ban ïoh ïa ka jubab kaba biang na phi bad na ki Myntri Sorkar. Lada phi kam ba phi long uba don jingkitkhlieh, phim dei ban khynniat ïa ngi sha surok sa shisien lymne ban pynduh ka hok jong ki khynnah ban leit skul khlem ki nongai jinghikai,” la maham ka Seng.