Shillong, Rymphang 03: U Myntri ka tnad Soil & Water Conservation u Marcuise N Marak, ula pynbna ba ka sorkar jylla kan tei haduh 532 tylli ki pung pynlang um hapoh jong ka Climate-Adaptive Community-Based Water Harvesting Project.
Ïa kane ka projek yn bei tyngka da ka Asian Development Bank (ADB) kaba la dep ruh ban khot ïa ka tender bad la khmih lynti ba ka jingpyntrei ïa ki kam ki jam kin sdang noh mynta u bnai ha East Khasi Hills District.
Ha kaba ïadei bad kane haba ïakren bad ki nongthoh khubor, u Marcuise Marak ula pynthikna da kaba ong, “Ka hap hapoh ka tnad Soil and Water Conservation bad ïa katei ka projek la khot da ka Climate-Adaptive and Community-Based Water Harvesting Project. Ka dei kaba la bei tyngka da ka ADB bad la dep ban khot tender. Ka jingpyntrei ïa kine ki project kan sa sdang noh shen bad ka jingpynkhreh ïa ka Work Order ka dang ïaid shakhmat.”
Halor kane u Myntri ula pyntip ba ha ka wat kaba nyngkong, ka project kan long ïa ka nongbah Shillong, East Khasi Hills district, bad la dep ban pynmih ïa ka tender bad lah dep ban pynbeit ïa ki kam namar ba ka donkam ban ïoh ïa ka jingmynjur na ka ADB.
“Shisien ba ka ADB ka la ai ïa ka jingmynjur, ngin sa aiti noh ïa ka kam sha ki kontraktor ne kompeni kiba la shah jied. Hadien kane yn sa pynïar ïa ka jingtreikam jong kane ka projek ha rilum Garo ruh. Baroh kiei kiei ki long kiba la pynkhreh bad shen ngin sa sdang noh shen ïa kane ka projek,” ula bynrap.
Halor kane u Myntri ula batai ruh ha kaba ïadei bad ka jingkhot tender, “Shisien ba ka ADB ka la ai jingmynjur ïa baroh ki projek, baroh ki kontraktor kiba la thep tender yn sa pdiang. Ka jingkhot tender ka kynthup ïa ki ar tylli ki bynta kawei kadei ka Technical bad kawei pat kadei ka Financial. Shisien ba la pyndep ïa kitei kiei kiei baroh ngin sa sdang noh mardor ïa ka projek”.
Haba kylli halor ka jingbuh por ban sdang ïa ka projek, u Myntri ula ong, “La kumno kumno, ngi lah ban sdang ïa katei ka projek ha u bnai Rymphang. Ngi don jingkyrmen ban ïoh sdang noh”.
Ha kaba ïadei bad ki projek ha East Khasi Hills District, u Myntri ula ong, “Na ka bynta ka East Khasi Hills district baroh kawei ki don bun tylli ki projek. Ïa mynta la dep ban khot tender ha kylleng ki jaka”.
Halor jingbuh por ban pyndep ïa ka projek, u Marcuise Marak ula ong, “Ngin ai por kumba 24 haduh 36 bnai ban pyndep ïa ka projek. Ka ADB kan sa khmih bniah ïa ka jingpynïaid shakhmat ïa ki kam ki jam jong ka projek bad ki bor sorkar bad ka tnad Soil and Water Conservation ruh kin sa khmih bniah lang ïa ka jingpyntrei ïa ki kam.
“Ka jingshim ïa ka sienjam ban pyllang ïa ka um ka dei kaba laleh da ka jingthmu ban pynthikna ba ka jylla kan ym kyrduh um bad kan lah kyrda ruh na ka jingkylla ka suiñbneng hapoh ka jylla,” ong u Myntri Sorkar.
