Baroh ki kyrtong na ki constituency ba don ki MLA VPP kin sa rem lut : Bah Pynïaid

Heh tang ka tyngam khlem ka kam
Shillong, Rymphang 03 : U Chief Executive Member (CEM) jong ka Khasi Hills Autonomous District Council (KHADC), Bah Pynïaid Sing Syiem ha ka sngi Nyngkong u la pyndep ïa ka jingthep kyrteng kum u kyrtong ka NPP ban aireng na Nongthymmai ha kane ka elekshon MDC kaban sa long ha ka 21tarik mynta u bnai.
Lah ban pynkynmaw hangne ba u Bah Pynïaid ha ka samoi ba la dep u la ïakhun bad jop na Sohryngkham constituency hynrei mynta ka kynti pat u la mih ban ïakhun na Nongthymmai constituency hadien ba u MDC ka thaiñ Bah Latiplang Kharkongor u la khlad noh.
Ïa u Bah Pynïaid ha kane ka sngi la synran lang ruh da ki nongïalam jong ki district council na ka thain shatei lam-mihngi jong ka ri ryngkat ki nongïalam bad kumjuh ki nongkyrshan.
Haba kren bad ki lad pathai khubor, u Bah Pynïaid u la ong ba ki bor jong ka social media ki la treikam borbah bha ha ka elekshon ba ladep bad bun ki la shah ïalam bakla. “Hynrei mynta ki paidbah ki la sngewthuh bad kin sa ai ïa ka jubab kaba shai,” u la ong.
U ong ruh ba ki paidbah kin sa sakhi ba na ki constituency ba mihkhmat daki MLA jong ka VPP, baroh ki kyrtong kin sa rem lut. “Baroh kin sa rem lut namar ki paidbah ki la sngewthuh naba shwa ka elekshon ki la don bun bha ki jingkular hynrei hadien ba ki la jop pat kim shym lah ban pyndep ïa ka. Kumta ki apidbah khlem artatien kin sa ai da ka jubab kaba shai ha kane ka elekshon MDC,” u la ong haba kren bad ki lad pathai khubor hadien ba la dep ban thep kyrteng ha ISBT ha Mawiong.
Da kaba kyntu ïa ki paidbah ba kin jied da ka jingshemphang ïa ki kyrtong ha kane ka elekshon, u Bah Pynïaid u la ong, “Nga kyntu ïa ki paidbah ba kin jied ia u kyrtong uba lah ban trei da kaba buh hakhmat eh ba ka kam jong u MDC ka long kaba eh bha khamtam lei da ka jingdon kane ka jingtyrwa ban pynbeit thymmai ïa ka Khyrnit kaba Hynriew ha ka Parliament. Kumta nga kyntu ïa baroh ki paidbah ba kidei ban kyrshan ïa ki kyrtong kiba lah ban noh synniang ha kaban pynkhlaiñ shuh shuh ïa ka Khyrnit kaba Hynriew jong ka Riti Synshar jongka Ri na bynta ban ïada ïa ka jaidbynriew trai muluk.”
Haba kren pat halor ka jingdawa jong ka VPP ïa ka Article 371, na ka liang u Bah Pynïaid u la ong, “Lada ki paidbah na Nagaland kiba la don ïa ka Article 371 ki dang wan shane ban kynduh ïa ngi namar ki kwah ïa ka Khyrnit kaba Hynriew, kumta phi lah ban bishar hi dalade kaei kaba kham kongsan bad kham khlain bor na bynta ki jaka riewlum jongngi.”
Ha kajuh ka por u la kyntu ruh ïa baroh ki kyrtong ba kin buh shadien ïa ka jingsngew party hadien ba ki la shah jied sha District Council da kaba ong ba ki paidbah hi nyngkong ki jied ïa ki kyrtong ba ki sngewtynnad sngewjan ym dei eh ïa ka party ha ka elekshon MDC.