Rat dyngkhong ia ka jingpyntrei bordi ia ki heprit, pynsngewthuh ka SPARK sha ki paidbah

Shillong, Jylliew, 12: Ka SPARK ka kynhun kaba peit ïa ka bha ka miat jong ki khynnah rit kiba wan na ki longiing kiba kham duna ha ka kot ha ka sngi u Blei ka la pynlong ïa ki jingïalang ha ki shnong bapher bapher ka jylla ban pynsngewthuh sha ki nongshong shnong ha kaba ïadei bad ka jingpynkut noh ïa ka jingpyntrei bordi ïa ki khynnah rit kiba dang donkam ban heh bad san ha ka pule ka puthi bad ka koit ka khiah.
Kane ka long kum shi bynta ka jingrakhe ïa ka World Day Against Child Labour, mynta u snem halor ka phang “Universal Social Protection to End Child Labour.”
Lyngba kane ka jingrakhe kaba shitaiew la pynlong ïa ki jingai jinghikai bad ki jingpynsngewthuh sha ki imlang ka sahlang bad sha ki kmie ki kpa kumno ban ïada ïa ki khynnah rit na ka jingshah pyntrei jubor ha ka rta kaba dang rit.
Katkum ka thymmei khubor, ka jingwan lynshop jong ka khlam jingpang Coronavirus bad ka jingeh kaba ka pyrthei ka mad, ka la don ka jingpyntrei jubor ïa ki khynnah rit ha kylleng ka pyrthei na ka daw ka jinghiran ha ka ïohkam ïohjam, ong ka President jong ka SPARK ka Shima Modak.
Ha ki 12 snem ba la leit noh, ka SPARK ka la trei na ka bynta ka bha ka miat jong ki khynnah rit bad ban pyllait ïa ki na ka jingshah pyntrei bordi bad na kiwei kiwei de ki rukom ba la pyndonkam bakla ïa ki khynnah rit. Kumjuh ruh, kane ka kynhun ka la trei shitom ban ïalam biang ïa kine ki khynnah rit sha ki saw kynroh jong ka skul bad ban plie lad ïa ki ba kin dup lah ban pynurlong ïa ka jingangnud na ka bynta ka lawei kaba dang wan.
Mynta u snem, ha ka jingpynlong ïa ka jingrakhe kaba shitaiew kynthih, la pynlong ïa ki jingai jinghikai bad ki jingpynsngewthuh paidbah ha Iewduh, ha ka shnong Mawlynrei Trianshnong, ha shnong Mawlong Umsawli, ha Rangmen bad ha ka shnong Mawphor Pongkung da kaba buh hakhmat ïa ka thong ban pynphriang ïa ka khubor hapdeng ka imlang ka sahlang shaphang kane ka jingma kaba ap na ka jingpyntrei bordi ïa ki khynnah rit kaba pynjot ïa ka jingim jong ki namarba la knieh noh ïa ka jinglong khynnah kaba shisur hynrei la khynñiat pat ïa ki sha ka jingdum da kaba pyndonkam bakla ïa ki.
Ka Shima Modak ka la pynsngewthuh sha ki shnong ki thaw halor ka bynta kaba kongsan bad ka jingkitkhlieh ban rat dyngkhong pura ïa ka jingpyndonkam bakla ïa ki khynnah rit kaba dang ïai bteng haduh kine ki sngi.
Ka la kren ruh sha ki kmie ki kpa ba ki dei ban long ki nongsumar bad ki nongri nongkdup na ka bynta ban pynheh pynsan ïa ki khun ha ka rukom kaba dei.
Ka SPARK ka la pynlong ruh ïa ka jingïasoi paidbah bad ka jingpyni ïa ki phlim kiba ïadei bad ka jingshah pyntrei bordi jong ki khynnah rit da kaba tah ïa ki poster kiba kren pyrshah ïa ka jingpynkheiñ ïa ka hok jong ki khynnah rit.
Ïa ki khynnah rit kiba kane ka kynhun ka la lap ha ki jingshah pyntrei bordi la ïalam biang ïa ki sha skul bad la pynrung kyrteng ha ki shlem hikai jong ka SPARK.
“Mynta ki la kieng ïa ki plakot ym shuh ïa ki pla jot.
Ka SPARK ka khot bad wer ruh ïa kino kino kiba don ka jingkitkhlieh ban wan shakhmat ban ïatynrong lem ïa ki jingkit kiba khia ban trei na ka bynta ka bha ka miat jong ki khynnah rit.