Kam pher lada nga hap ban shong marwei ruh, ngan burom ïa ka rai u paidbah : Bah Teibor

Shillong, Rymphang 03 : U kyrtong shimet na Mawlai constituency, Bah Teibor Pathaw ha ka sngi Nyngkong u la ong ba u kwah ban pynshai sha ki paidbah ba u la pynkut lut ïa ka jingïadei bad ka party ba rim kaba u la mih ban aireng ha ka elekshon MLA ha u snem 2023.
Ïa kane u Bah Teibor u la kren hadien ba la dep ban bishar bniah ïa ki kot ki sla jong u kum u kyrtong ban aireng ha kane ka elekshon MDC kaban sa long ha ka 21 tarik mynta u bnai.
Haba kren bad ki lad pathai khubor, u Bah Teibor u la ong ba u sngewthuh ïa ka jingsngewsih jong ki paidbah halor ka jingleit ïakhun jong u na kawei pat ka party ha ka elekshon MLA ha u snem 2023. Kumta u ong ruh ba dei lyngba ka jingkyrpad jong ki paidbah ba u la shim ïa ka rai ban mih aireng ha kane ka elekshon MDC kum u kyrtong shimet.
“Ha ka elekshon ka don beit ka jingkynthoh khamtam na kiba ïakhun pyrshah ïangi. Tangba da nga la jop ngan rai lang bad u paidbah kampher watla nga hap ban shong marwei ruh,” la bynrap biang u Bah Teibor.
Shwa kane, u la ong ruh ba u kwah ban panmap na ki paidbah ka Mawlai constituency namar u sngewthuh ba ki la don bun bha kiba la sngewsih halor ka elekshon MLA kaba la dep ha u 2023 tang namar ba u leit ban ïakhun na kawei pat ka party.
U Bah Teibor ha kane ka sngi u la ong ruh ba ha kine ki 6 snem kum u MDC u la pyrshang lut ban trei ïa kaba bha tam kum u MDC ha baroh ki liang. “Ha kine ki hynriew tylli ki snem ki matti ki la don ha jan man ki shnong jong ka Mawlai katkum ka bor jong u MDC lyngba ka jinglah jongnga ban pynïadei bad ki tnad sorkar bapher bapher,” u la ong.
Nangta u ong ruh ba ka don ka jingangnud na ka bynta ban kyntiew ïa ki khun samla khamtam naba katei kadei ka kam kaba u la don bynta la palat 20 snem kum u briew uba shakri ïa ka shnong Mawlai.
“Nangne shakhamt ngan ïakhun tyngeh ban trei borbah shuh shuh na bynta ka shnong Mawlai ba kan long kawei na ki constituency kaba paw ha ka jylla,” u la bynrap biang.
Ha kajuh ka por u la pyntip ruh ba ka shap ba u ïoh kum na bynta kane ka elekshon MDC kum u kyrtong shimet kadei ha ka shap jong u Mawbynna.