Ha kajuh ka sngi thep kyrteng ki kyrtong na ka BJP, ka KHNAM bad ar ngut na ka INC

Mawkyrwat, Rymphang 03 : Ki kyrtong ki ban sa ïa khun ïa ka MDC Election na ka Mawkyrwat bad Langrin District Council Constituency mynta ka sngi ka 03 tarik Rymphang, 2025 ki la ïoh ban pyndep ïa ki jingthep ïa ki kyrteng ha ki Returning Officer ba kin long ki kyrtong ki ban sa ïa khun ha ka MDC Election 2025 ka ban sa long ha ka 21 tarik u Rymphang, 2025.
Lah ban kdew ba ki kyrtong kiba la pyndep ban thep kyrteng ki long u bah Medalsing Lyngdoh u kyrtong jong ka Indian National Congress (INC) bad u bah Baristar Paul Thyrniang u kyrtong jong ka Khun Hynñiewtrep National Awakening Movement (KHNAM) kiba dei na ka 25-Mawkyrwat District Council Constituency bad u bah Pherdonnam Rngaid u kyrtong jong ka Indian National Congress (INC) bad u bah Lewis Janong Sooting u kyrtong jong ka Bharatiya Janata Party (BJP) kiba dei na ka 26-Langrin District Council Constituency.
Ïa ki kyrtong jong ka Indian National Congress (INC) la synrang lang naduh u bah Martin M. Danggo, u bah Kynpham V. Kharlyngdoh, President ka District Congress Committee, u bah Manstudy Nongrem, u bah Nicholas Tympuiñ, President Mawkyrwat Block Congress Committee lem bad kiwei ki nongkyrshan na Mawkyrwat bad Langrin District Council Constituency.
Katba ïa u kytong jong ka BJP bad ka KHNAM ruh la synrang da ki nongkyrshan kiba dei ruh ki nongkitkam ba hakhmat jong kitei ki ar tylli ki party.