Ka sorkar MDA kan kdup lang ïa ki nongtih dewiong ba rit ha ka rukom tih dewiong ba thymmai ong u CM

Shillong, Rymphang 2 : Ka sorkar Meghalaya Democratic Alliace hapoh ka jingïalam jongka National Peoples’ Party (NPP) ba la khlieh da u Myntri Rangbah u Conrad K Sangma ka la rai ban kdup lang ïa kine ki nongtih dewiong ba rit hadien ba sorkar pdeng ka la shah mynta ban sdang noh ïa ka jingtih dewiong hapoh ka jylla kat kum kane ka juk jingstad Saian ba mynta, ong u Myntri Rangbah ka jylla.
Dang ha ka 29 tarik Kyllalyngkot la ïasoi ïa ki soskular hapdeng ka Controller of Coal, ka sorkar pdeng bad ki kompani ban tih dewiong ha Pyndeng Shahlang, West Khasi Hills, Saryngkham, East Jaintia Hills, Lumiakhi Wahsarang, East Jaintia Hills. Kine ki soskular ki long na ka bynta ban sdang noh ïa ka jingtih dewiong.
“ Mynta ka kamram jongnga ka long kumno ban kdup bad kynthup lang ïa ki nongtih bad nongkhaïi dewiong ba rit ha kane ka rukom tih dewiong da ka buit stad saian” ong u Myntri Rangbah u Conrad K Sangma ha ka jingïakren bad ki nongthoh khubor. U la jubab ïa kane halor ka jingkylli kumno u sngew halor ka jingdawa kine ki nongtih dewiong ban pynkylla ïa ka SOP kaba lah ban ïarap ïa kiwei ban ïoh laisen da kaba pynbna noh ba yn shah ban tih dewiong ha ki jaka ba hapoh ka 100 hectare ruh.
“ Ngi don ka jingpyrhat na ka bynta ki nongtih bad nongkhaïi ba rit ruh hynrei mynta ngi dang ïai ïakren bad ïamir jingmut bad ka sorkar pdeng. ïa mynta namar ba ngin dang sdang ngim lah ban tip kumno kan long bad ngim pat nud ban ïakren ne ban jur than ïa ka sorkar pdeng ruh. Namar baroh shi katta ka jingkhroh ïa ka sorkar pdeng ka long shwa ban pynshai ba ka jingbat jaka puta ha ka jylla ka dei da ki riew shimet ym da ka sorkar jylla kumba long sha kiwei ki jylla kumta hap ban ai tih dewiong sha ki riew shimet ne ki kompani. Ha kaba nyngkong ka sorkar pdeng ka la ïeng ha ka nongrim ba kan ym shah ban tih da ki riew shimet hynrei haba ngi la batai bad pynshai sani bha ïa ka rukom bat jaka puta na kata ka daw mynta ka la shah ban pynïaid shakhmat ïa ka jingtih dewiong hapoh ka jylla. Ki bun palat ki kyndon kiba hap ban bud ban ïoh tih dewiong kumta ka long kaba eh ban pynbor ïa ka sorkar pdeng ban pynkylla ïa ki kyndon ruh. Ka jingkmen ka long ba ngi la ïoh shwa ban sdang mynta ïa ka jingtih dewiong hapoh ka jylla bad ïa kita ki kyndon ngin dang ïai bud dien bad ka sorkar pdeng” ong u Myntri Rangbah.
“Hooid halor kane ka jingdawa ban wanrah jingpynkylla halor kane ka 100 hectare ka jaka, nga la bishar bniah bad nga lap ba kane ka dei ka kyndon kaba pyntreikam ha baroh kawei ka ri bad ka dei ka polisi jongka sorkar pdeng. Kumta ban wanrah ka jingpynkylla ban pynhiar sha ka 10 acre ka long sa kawei ka bynta kaba nga hap ban ïakren bd ka sorkar pdeng. Namar lada ngi pynbor than ïa ka sorkar pdeng ban wanrah ïa ki jingpynkylla ruh tieng pat ïoh duh syndon ka tih dewiong. Kumta ai shwa ngin sdang da kane ka 100 hectare bad hadien kane namar kumba 90 % ki nongtih bad khaïi dewiong ki dei kiba rit kumta ngin sa ïakren bad ka sorkar pdeng ban weng noh ïa uwei u nod ne ïa baroh ar tylli ki nod khnang ba kiba rit ruh kin lah ban tih bad khaïi dewiong ha ka jylla. Kane ka dei ka rai kaba sa shisien ngan hap ban shim khia ban ïakren bad ka sorkar pdeng. ïa mynta to ngin ailad ban sdang shwa kane ka jingtih dewiong bad suki suki ngin sa ïakren ban wan rah ki jingpynkylla. Kumba long mynta ki don lai ngut ki nongkhaïi dewiong kiba la ïoh licence ban tih dewiong kat kum ka juk stad saian ba mynta” pynkut u Myntri Rangbah.