Khliehriat jylliew 11:Ka East Jaiñtia National Council Khliehriat Circle, lyngba u kyrwoh na u General Secretary(EJNC-KC), u samla Mebanteilang Sukhlaiñ, la ong ba ka seng ka ai ka jingkhublei sngew nguh bad ai jingiaroh ïa u Deputy Commissioner East Jaiñtia Hills District, u Abhilasah Banarwal, IAS u ba la kloi ban shim khia ha kaba iadei bad ka jingsniew jingjulor ka surok, ha kaba u la phah bad bthah ïa ki nongtrei jong ka NHAI ban maramot noh mardor ïa ka surok kaba la julor bad mynta ki nongtrei ki dang iakhun ban maramot ïa ka surok kaba la jot bad julor ha shi lynter ka surok NH ha East Jaiñtia Hills District.
Na ka liang u Abhilash Banarwal ruh, u la ong ba mynta ki nongtrei jong ka NHAI ki la sdang ban maramot ïa ka surok ha kiba bun ki bynta kiba la julor bad ong ruh ba ka NHAI ka la pyntikna ruh ba nangne shakhmat kan nym pynslem shuh ban pynkhuid ïa ka surok, ha kajuh ka por u Deputy Commissioner u la dep bhtah ruh ïa ka NHAI ba ka dei ban pynpoi ïa ki kaiphot halor kaei ka daw kaba la pynlong ïa ka surok ba kan julor khah khah man la ka por “Ki bor synshar district kin shim khia ban leh ïa kaba donkam ban pyn tikna ruh ba kan nym don shuh kano kano ka jingthut ïa ki paidbah nongleit nongwan” pynpaw u Abhilash Banarwal, IAS.
Shuh shuh, katkum u kyrwoh na ka EJNC Khliehriat Circle, ka seng ka pynkynmaw ba myn ha ka 20 tarik u jymmang 2022 ka seng da ka jingsngew khia ka la leit ban maramot hi ïa ka surok kaba la julor palat ha sorbah Khliehriat, hadien kane ruh ka seng kam shym la shong kli kti ba ha ka 23-05-2022 ka la leit ruh ban ai da ka dorkhas ha u Deputy Commissioner ka EJHD ban ai ruh da ka jingmaham ba tyngeh ba lada ka NHAI kam shimkhia ban leh ïa kaei kaba ka dei ban leh ka seng kan sa leit ban khang khyrdep noh shisyndon ïa ka office jong ka NHAI bad ïa ka jaka lum khajna jong ka NHAI, ka Toll Gate Plaza kaba don ha Lumshnong.
“Ngi dap da ka jingsngewkmen ba u Deputy Commissioner u la shimkhia ïa kane ka jing ud jong ki paidbah ka thaiñ bad ka seng ka kitbok kitrwiang ruh ïa u DC ba un nang lah shuh ban trei ïa kiwei kiwei ki kam kiba kiba bha kiba na ka bynta ka jingbit jingbiang ki paidbah ka thaiñ, ha kaba iadei bad ka surok pat ka seng ruh kan sa nang ïai buddien ïa ka NHAI ba ka dei ban maramot bha ym dei ban maramot tang ban shu neh kai tang shipor arpor hynrei dei ban da peit bad shna bha ruh naduh ki nala tuid um, ki jaka ba shong um, ba sahkut ka um khnang ba kan nym wanrah ne buh jingeh ïa ki paidbah nongleit nongwan kiba dei iaid lyngba na ka surok national highway na East Jaiñtia Hills District” pynkut u kyrwoh.
