Shillong, K’lyngkot 31: Ka Directorate of Enforcement (DE) ka la lap ha ka jingtohkit ba ki karkhana coke be-aiñ ha West Khasi Hills District, ki la kamai spah bun bha na ki kam bymman, khamtam eh ka jingdie ïa u dewïong ba la dep tih be-aiñ bad u coke ba la dep saiñ ha kine ki thaiñ.
La ïathuh ba ka Directorate of Enforcement (DE) Shillong Sub Zonal Office ka la pynlong ïa ka jingkhynra ha ka 28 tarik Kyllalyngkot hapoh ka kyndon jong ka Prevention of Money Laundering Act (PMLA), 2002, ha kiba bun ki jaka ha Guwahati bad Kolkata kiba don jingïadei bad ki karkhana coke beaiñ ha Meghalaya, kiba la shah khang khyrdep namar ka hukum jong ka Ïingkashari Meghalaya High Court lyngba ka PIL No 14 of 2022.
Lah ban pynkynmaw ba ka Ïingkashari Meghalaya High Court ha ka hukum ba 16 tarik Nohprah, 2022, ha ka PIL No 14 of 2022, ka la pymih ka hukum ban khangdam ïa baroh ki karkhana coke hapoh ka jylla Meghalaya.
U ADC-cum-SDO (Civil), Mawshynrut Civil Sub Division ula ujor da ka ejahar hadien ka jingïakhynra lang bad ki Pulit, kaba la pynlong syndon sha ka jingkhangdam haduh 57 tylli ki karkhana coke ha ka thaiñ Shallang, West Khasi Hills District, kum ka jingpyntreikam ïa ka hukum ka Ïingkashari Meghalaya High Court.
Ka Directorate of Enforcement ka la pynlong ïa ka jingtohkit halor ka jingbuhrieh ïa ka tyllong jong ka pisa ba kamai beaiñ (money laundering) halor ka nongrim jong ka ejahar ba la register hapoh ka Shallang Police Station, West Khasi Hills District.
Ka jingtohkit jong ka DE ka la pynpaw ba ki karkhana coke ki la shah pynpra namar ba ki la treikam beaiñ, katto katne kila treikam khlem ki jingbit bad kiwei kiwei ki jingpynkheiñ ïa ki kyndon ïada ïa ka mariang.
Ka jingtohkit ka pynpaw ruh ba ka jingpyntreikam ïa kine ki karkhana coke beaiñ ka dei kaba la leh khambun eh da ki briew na Assam bad kila pynïaid beaiñ ïa ki kam jong kine ki karkhana coke ha Meghalaya. Bun tylli na kine ki karkhana coke ki dei kiba la pynïaid da ka benami ha kaba la pyni ba ki trai shnong na Meghalaya kiba long trai katba ki briew ba pynïaid pat ïa ka kam ki dei na Assam.
Ha ka jingtohkit ka shem ruh ba kine ki karkhana coke ki la pyndonkam beit ïa u dewïong ba tih be-aiñ bad kim don satia ïa ka tyllong ban ïoh dewïong ba ïaid katkum ka aiñ.
Ha ka jingkhynra, ka DE ka la ïoh ban kurup ïa katto katne ki kot ki sla ba donkam bad la kurup noh ïa ki. Ka la ïoh kurup ruh ïa ka pisa ba kot T.14.2 lak nalor ka jingshem ïa bun bah ki kam ïa siew ïa ka pisa ha jaka khappud.
Lah kurup ruh ïa bun bah ki kot ki sla nongkynti bad ki Bank bad Mutual Fund Account, kaba pynshisha ba ki karkhana coke ha West Khasi Hills District ki la kamai bun bha ka pisa na ki kam bymman, khamtam lyngba ka jingdie beaiñ ïa u dewïong ba tih be-aiñ bad u coke ba la dep saiñ. Ha kaba ïadei bad kane la ïathuh ba ka jingtohkit shuh shuh ïa kane ka kam ka dang ïaid shakhmat khnang ban dang lap shuh shuh ïa kine ki kam beaiñ ha kane ka thaiñ.
