Shillong, K’lyngkot 31 : U Chairman ka Khasi Hills Autonomous District Council (KHADC) bad MDC jongka Mawphlang-Diengiei Constituency u Bah Lamphrang Blah mynta ka sngi Thohdieng, ula leit thep kyrteng kum u kyrtong ka NPP ban iakhun biang sa shisien ia ka elekshon MDC na ka Mawphlang-Diengiei constituency bad kane kan dei ka sien kaba san ba u iakhun bad u la jop la saw sien lynter.
Haba ïakren bad ki nongthoh khubor, u Bah Blah ula pynpaw ïa ka jingskhem jingmut ba un wanphai bad ba ki paidbah kin pynjop donburom biang ïa u ha kane ka elekshon MDC.
“Nga dap da ka jingsngewnguh ïa ki paidbah jong ka constituency ïa ka jingieid bad ka jingkyrshan ka jongki ha kaba kila jied ïa nga ban mihkhmat saw sien lynter. Kumta nga don ïaka jingmut kaba skhem ba sa shisien kin dang ai biang ka jingshaniah ha nga” ula ong.
“Kum ka seng, ngi lah leh shibun ki kam na ka bynta ka bha ka miat jong ki paidbah hynrei ki dang don bun kiba ngi dang hap ban leh. Kumta nga kyntu ïa ki paidbah bad ai biang ka lad ïa nga ba ngan mihkhmat biang kum u MDC u jongki sha ka KHADC,” la pynkut u Bah Blah.
