Nongstoiñ, Jylliew, 12: Ka jingïap ki shalynnai bad ki dohkha ba dang rit ha kawei ka pung kaba don sha phang mihngi jong u kliar lum Mawthadraishan, kaba dang hap hapoh u pud u sam jong ka shnong Lawdisai, la suba ba ki don ki runar kiba ber dawai bih, ong ki trai jong katei ka pung ba kynthup ïa u bah Aiborlang Syiem Shangoi bad u bah Beldingstone Lyngdoh Nonglait ki la leit ban mudui da ka ejhar sha Mairang Police Station halor katei ka jingjia.
Na ka liang kine ki rangbah mar mar ki la ujor ejahar ha Mairang bad ha ka sngi saitjaiñ, u bah S.Kharjana Officer Incharge ka Mairang Police Station, ryngkat ka kynhun jong u ki la leit sha katei ka pung ban jurip bad ban shim nuksa ïa ka um bad ki doh ba la ïap, na ka bynta ban phah sha ka Forensic Laboratory, ban leh ïa ka jingwad bniah ban lap ïa ka daw jong ka jingïap.
Ha katei ka sngi na ka liang jong kitei ki trai jaka, ryngkat ki rangbah shnong lem bad u Lyngdoh ka hima Myrïaw, ki la synran lang ïa ki pulit ha katei ka jingleit jurip ïa katei ka pung. Ki la ong ruh ba ka jingïap jong ki doh um ha katei ka pung ha ki khyndiat sngi ba la dep, na ka liang ki nongïalam ka Khasi Student Union Mawthad-raishan circle ki la leit ban ïakynduh ïa u Deputy Commissioner ka Eastern West Khasi Hills, ban pyntip bad ban ïaphylliew jingmut kumno yn leh halor katei ka jingjia.
Haba kren sha ki lad pathai khubor u bah Darwel Hoojon Secretary ka shnong Lawdisai, u la pynrem jur ïa ki runar kiba la leh ïa katei ka kam bad ong ruh ba ka jingpynïap dusmon ïa ki don um dohwah, ki sim ki doh, ka dei ka kam bymman kaba shyrkhei bad ka bym lah ban pdiang ha ka imlang sahlang.
La ong ruh ba ka jingber dawai bih ban pynïap ïa ki doh um ha katei ka pung, ka lah ban ktah ruh ïa ki paitbah nongshong shnong jong ki hynñiew tylli ki shnong ba kynthup naduh ka Mawkhmahrang, Domkseh, Mawkyllei, Mawroh, Tiehnongbah, Lawbyrtun bad Umdum, namar ka tyllong um ka dei na katei ka pung.
Kitei ki riew rangbsh ki la ai khublei ruh ïa ki pulit ka Mairang kiba la shimkhia, ban wan jurip ïa ka jingpynïap pathar jong ki runar ïa ki doh um ha katei ka pung. Ki la kyrpad ruh ïa ka sorkar ba lada lap ïa ki briew kiba donkti ha kaba leh ïa katei ka kam, ka dei ban pynshitom da kaba tyngeh khnang ba kiwei ruh kin ym mlien shuh.
Na ka liang ki pulit ki la kyntu ba kino kino kiba leh ïa katei ka kam, ki dei ban wan pyndem noh kloi shuwa ba kin shah kem, namar ki pulit kin ym shong thait ban thwet ïa ki bad kin ym lah hi ruh ban lait da lei lei.
