Ka jinglong jingman jong nongbah Shillong ha kine ki sngi ka la paw bha ha ka jingkiew bad nangroi bha ha ki kam nuti kiba long ka jinglehraiñ kaba khraw ïa ka jaidbynriew Hynniewtrep; ka jingkiew skong jong kine ki kam lehraiñ ka la ktah mationg bha ia kiba bun ki riew ieit burom ban iohi ba ka kam awria kala jam sha u pud ba haduh kita kiba iadon bynta ki la ong “ka banse ka thom ia ka sang” haduh ban da mih syndon bluit da ka seng jong ki nuti. Kum ki riew paidbah kam long kaba suk ban jai jai ïa kum kane ka kam kaba ktah mationg, hynrei la don shibun kiba la pynpaw ïa ka jingsngew bitar shla bad naduh ki seng ieit burom haduh ki shnong ki thaw ki pynpaw ba kim lah da lei lei ban aili ïa kum kitei ki kam ban thad bad pynlehraiñ ïa ka jaidbynriew.
Lah ban pynkynmaw ia ka jingbuh jingkylli jong u MLA bah Adelbert Nongrum hapoh jong ka Iing Dorbar Thawaiñ, ban pan jingshai na u Myntri ki kam pohïing jong ka sorkar, uba la pynpaw ba ym shym la don jingtip satia ïa kiba kum kita ki kam nuti, hynrei tang hadien khyndiat sngi katei ka seng jong ki nuti dalade hi kala mih shakhhmat ban pynpaw paidbah kumba la lah ban ïohi lyngba ki kot khubor bad ruh ki Digital Media. Hadien kane la ïohi ruh ba kala mih ka jingpyrkhat na ka liang jong ka sorkar ban thaw ïa ki lad ki lynti kumno ban ïarap ia kitei ki briew kiba la ñiew ba ki dei ki riew shempap bad ngat ha ka jinglynshop ki jingeh ka jingim kaba la pynlong ña ki ban leit kat shaduh utei u pud.
Katno katne snem mynshuwa ngi la wanrah ïa ka jingkynthoh ba hato la ka jaidbynriew Hynniewtrep ka la long la kloi mo ban pdiang ban ithuh noh ïa ki kam nuti kum ka kam kamai jakpoh ban ithuh noh da ka aiñ? Ha kane ka kynti ruh la ïohi ba na ka liang jong ka seng ki nuti, ka la pynpaw ba ka kwah ban dawa na ka sorkar ban leh kumta. Shisha kum ka jaidbynriew ka long kaba eh ban kynthup ïa ka kam nuti ha ka imlang sahlang, khamtam lei ka dei ka jaidbynriew kaba dang shitroh bad ka nongbah shillong hi ka dang long ka sor kaba rit eh. Kat kum katei ka jingkylli ba la mih na u MLA la paw ba kitei ki nuti ki pynlong ktem ne steshon beit ha Khyndai lad kaba long tang ma ka hi ka jaka kaba baroh ki nongshnong shnong ka Shillong kim lah ban kiar na ka haba leit ba wan.
Naduh shuwa jong ka Lockdown bad naduh ba ka la sdang shongshit bha ka ïew die madan miet ha khyndailad, bun bah ki la sakhi ïa ka jingsdang kiew ki kam nuti bad haduh ba ka surok naduh lyndet Assembly barim haduh Parking jan SBI ka la long ka jaka iaid paret jong ki thei nuti bad ki kali ba bun jait ki poi ha kitei ki jaka. Ha kawei ka liang ka jong mih jong katei ka seng ka bha shibun khnang ba ki paidbah bad ruh ka imlang sahlang kin ïoh ban tip shai kdar kat haduh u pud ba kumno ka kane ka kam nuti ka la kiew ha kane ka jylla khamtam ha ka nongbah Shillong.
Haba sngap ïa ki jingkren bad ki jingphla jong ki ‘thei nuti lyngba jong ki digital media, la lah ban sngewthuh ba haduh katno ki la dei ki riew shempap. Katba lah ban sngewthuh hi ki kam nuti ki mih na ki ar jait ki jingjia kawei ka long ba don na pdeng jong ki kiba kwah ban im ha ka jingim sngewbha ha ka jingbrai jong ka doh bad khatduh ki kut pynban ha katei ka kam bad kiwei pat ka dei ka jingban khia jong ka jingim na ka jingshah ieh noh ha u kpa ki khun kumta ter ter.
Hynrei lada ka dei ia ka sorkar ban thaw ïa ki lad ki lynti na ka bynta ban ïarap ia kiba kum kitei ki riew shempap, kan bha shibun lada ka sorkar ka ïawer ia ki briew kiba shakri ïa ki mynsiem, kiba ka jingïarap bakongsan jong ki ka long ban wallam pat sha ka bor pyrkhat kaba thymmai da ka jingkylla kaba mut. Kata ka long da ki jingiasyllok kiba ai mynsiem ïa ki ban ym duh jingkyrmen wat la ki la ngop hynrei ka lad kaba thymmai ka don. Dei hadien ba ki briew kiba kum kitei kin ïoh mad ïa ka jingthymmai ka jingim kin sngewthuh ïa ka jingkit khlieh ïa ka burom ka akor bad ap kyrmeh ïa ka jingiarap na u Blei uba aibor ïa ki ban im ka jingim kaba beit lyngba ka jingshem mynsiem, ki kti ba sbun ki para briew bad ka sorkar.
HYNREI KABA LYNGNGOH KA LONG BA YM DON KI SENGBHALANG KIBA SHLAN BAN PEITLEM IA KATEI IA JYRSIEW KAT HADUH MYNTA RUH ?
