Nongstoiñ, K’lyngkot, 14: Ka West Khasi Students Union (WKSU) ka la dawa na ka Sorkar Jylla ban mang pisa noh kham kloi na ka bynta ban tei ïa ka Industrial Training Institute ha Sohpian West Khasi Hills, kumba la ju dawa na ka por sha ka por.
Katkum ka jingïathuh da u President Bah D.Sun, la ong ba na ka liang ka tnad Directorate of Employment and Craftsmen Training Shillong, hadien bun bun snem ba ka la wad jaka ban tei ïa katei ka jaka pule, ka la ïakynduh bad ki nongïalam jong ka seng ha snem 2013. Ha utei u snem ki bor ba dei peit jong katei ka tnad, ki la phah ïit jaka khnang ban tei ïoh tei noh la ka jong ka building ba pura.
Halor kane ka mat, ki nongïalam jong ka seng khlem da pynslem ki la ïakynduh mar mar ïa u sordar jong ka shnong Sohpian bad ïa u trai jaka ban ïa kren pynbeit ïa ka jaka kaba don mar syndah ka Fourth Battalion Nongstoiñ Sohpian, kaba long markhap ruh bad ka surok bah NH-44 E. Na ka liang u trai jaka ruh bad u sordar ruh, khlem artatien u la mynjur ban die noh ïa ka jaka sha ka tnad ba dei peit na ka bynta ban tei ïa ka I.T.I.
Haduh mynta ka jingïaid jong ka I.T.I ha Sohpian, ka long ba ïa katei ka jaka la dep pynbiang nadong sha dong da katei ka tnad ba dei peit ha kaba ïa dei bad ka jingsiew ïa ki trai jaka. Haba phai peit na ka Land & Survey Records ruh ki la pyndep ïa ka kamram na ka bynta ban survey ïa ka jaka. Ym tang katta, wat ka tnad Revenue kaba don ha Nongstoiñ ruh ki la dep pyndep ïa la ka kamram.
Ki nongïalam jong ka seng ki la buddien ïa katei ka mat, da kaba ki la ïakynduh biang ïa ki bor ba halor jong ka DECT. Na ka liang katei ka tnad ka la pynpaw ba tad ynda ka sorkar ka la mang tyngka na ka bynta ban tei ïa katei ka shlem ai jinghikai, ba na ka liang ka tnad Labour Department Shillong ryngkat ka jingïatreilang bad ka DECT kin sah pynurlong noh ban tei ïa ka I.T.I.
Kum ban shu pynkynmaw ba na ka liang ka sorkar barim hapoh ka jingïalam jong u Dr. Mukul Sangma kum u Myntri rangbah ka jylla bad myntri ka tnad pule Kong Ampareen Lyngdoh, ki sdang ban shimkhia bad ai ka jingmynjur ban don noh la ka jong ka I.T.I ba pura ha Sohpian. Hynrei kim shim ïoh lad ban pynurlong ban wan plie ban tei ïa katei ka jaka ai jinghikai, namar ka jingkylla jong ka por.
Hynrei ka don ka jingkyrmen skhem ba kane ka sorkar ba mynta hapoh ka jingïalam jong u Conrad Sangma, ban shimkhia noh da kaba mang tyngka noh kham kloi khnang ban ïoh ban tei noh ïa katei ka ïing kum ka shlem ai jinghikai pyntbit ïa ki samla pule jong ka thaiñ sepngi baroh kawei, ha ki laiñ pule bapher bapher.
