Khliehriat, K’ lyngkot, 10: Ka Jaiñtia National Council (JNC) Central Executive Committee ka la pynshai halor ki mat bad jingthmu jong ka Save Jaiñtia Mission kaba ka kynhun ka la seng nongrim naduh ka 14 tarik, Nohprah 2024.
Ha u kyrwoh ba la phah da u Publicity Secretary u Bah Mebanteilang Sukhlaiñ ka seng ka la ong, “ka nongrim jong ka Save Jaiñtia Mission kaba dang shu dep pynbna paidbah ka don san tylli ki mat jingdawa, kata, ban pynkhlaiñ ïa ka JHADC, ban dawa pynrung ïa ka ktien Jaiñtia ha ka State Launguage Act jong ka jylla bad ban pynrung ruh ha ka jingrwai Meghalaya Anthem. Ka Save Jaiñtia Mission ka dawa ruh ban pynshna noh ïa ka polisi bathymmai ha ka rukom thungkam thung jam ha ki kharkhana dewbilat, ban pynbeit noh ïa u pud u sam hapdeng ka rilum Jaiñtia bad ka jylla Assam da kaba pynshong nongrim ïa ka Pre 1951 Jaiñtia Hills Map bad kaba khatduh ka long ka jingdawa ban pynshna noh ïa ka Small Scale Coal Mining Policy”
“Hapoh kane ka mishon ka seng ka ladep ban thaw ïa kawei ka shnat treikam ka ban sa tip kum ka Employment Commission ka ban peitngor ïa ka rukom thungkam thungjam jong ki kharkhana pynmih dewbilat kiba don ha baroh kawei ka rilum Jaiñtia khnang ba ka rukom thungkam kan ym long kaba noh shiliang bad kane ka Commission shen kan sa leit ruh ban khynra ïa ki kot ki sla jong ki briew kiba nabar kiba trei beaiñ ha kine ki kharkhana,” ong u kyrwoh.
“Ïa ka Save Jaiñtia Mission ka seng kan sa sdang noh ban ïaid lynti bad ai jingpynshai sha ki paidbah da kaba yn sa pynlong ïa ka jingïalang paidbah ha sor bah Jowai, ha ïawmusiang ha ka 15 tarik mynta u bnai bad ban pynshai ruh ïa ka jingmut jong ka seng ha kaba ïadei bad ka jingthaw ïa kane ka mishon,” la pyntip u kyrwoh.
Lyngba une u kyrwoh ka seng ka pan ruh ïa ka jingkyrshan kaba pura na ki paidbah ban ïa don ryngkat lang bad ka seng ha ka 15 tarik mynta u bnai khnang ba ki jingmut kiba bha bad na ka bynta ka jingmyntoi ïa la ka ri kan ym long kaba sepei.
“Kumta ka seng ka khot bad wer ïa phi ki longkmie longkpa, ki khun samla, ki nongïalam sengbhalang bapher bapher kumjuh ruh ki nongïalam shnong bapher bapher ba phin sngewbha ban pyllait ïa ka por kaba kordor ka jong phi ban ïa don bynta lem bad ka seng. Ka jingdon bynta ka jong phi kan ai mynsiem ïa ngi shi katdei eh na ka bynta ban shakri hok ïa la ka ri bad ka jaitbynriew hi baroh kawei,” la pynkut u kyrwoh.
