Haduh 52,412 ngut kiew ki nongthep vote thymmai ha ka jylla, bun eh ka EKH da ki 6.16 lak ngut

Shillong, K’Lyngkot 06 : Ka jylla ha kine ki shisnem ka la sakhi ïa ka jingkiew haduh 52,412 ngut ki nongthep vote ba thymmai kaba pynlong mynta ïa ka Meghalaya ban don haduh 22,69,512 ngut ki nongthep vote ha baroh kawei ka jylla katkum ka final electoral roll tad haduh ka 06tarik Kyllalyngkot, 2025.
Haba pyntip ïa kane ka thup ba thymmai jong ki nongthep vote ha ka jylla, u Chief Electoral Officer (CEO) BDR Tiwari u la ïathuh ruh ba na kine ki 22,69,512 ngut ki nongthep vote ba ka jylla ka don, 11,18,907 ngut ki dei ki shynrang katba 11,50,599 ngut pat ki dei ki kynthei bad 6 ngut pat ki dei ki third gender.
U CEO haba kren bad ki lad pathai khubor u la ïathuh ruh ba ka EP Ratio tad haduh ka 06-01-2025 ka long 645, nangta ka Electors Gender Ratio tad haduh ka 06-01-2025 ka long 1028.
Nangta u la pyntip ruh ba ka jingdon ki nongthep vote kiba 18-19 snem ka rta haduh ka 06-01-2025 ka long 72,941 ngut bad ki nongthep vote kiba la don palat 85 snem ka rta ka long 10,398 ngut bad ki nongthep vote ba don jingthut ha ki dkhot met ki don baroh 11,960 ngut.
Shuh shuh u la ïathuh ruh ba ki jaka thep vote lane ki polling station mynta baroh ki don 3551 tylli na ki 3512 tylli ki polling kiba don ha ka elekshon Lok Sabha kaba dang shu lah ha u 2024.
Katkum ka jingïathuh da u CEO ka East Khasi Hills district kadei kaba bun tam ki nongthep vote namar ka don haduh 6,16,737 ngut ki nongthep vote, katba ka South West Khasi Hills distrik kadei kaba don duna tam ki nongthep vote da ki 77,636 ngut.
Ka West Jaintia Hills ka don 2,12,766 ngut ki nongthep vote, ka Ri Bhoi ka don 1,98,057 ngut, ka West Khasi Hills ka don 1,32,073 ngut ki nongthep vote, ka East Garo Hills ka don 1,09,259 ngut, ka West Garo Hills ka don 3,83,895 ngut, ka South Garo Hills district da ki 1,04,843 ngut, ka East Jaintia Hills da ki 1,00,284 ngut, ka North Garo Hills da ki 1,39,934, South West Garo Hills da ki 1,04,547 ngut, bad ka Eastern West Khasi Hills pat ka don 89,481 ngut ki nongthep vote.