Dei ban kyntiew kyrdan ïa ki nongtrei Aganwadi katkum ka jingshakri jong ki: AGHAWHF

Shillong, K’Lyngkot 02 : Ka All Garo Hills Anganwadi Worker & Helpers Federation (AGHAWHF) ka la phah tuklar ïa u Myntri Rangbah ka jylla u Conrad K Sangma halor ka jingpynslem ban kyntiew kyrdan ïa ka kam senior graduate Anganwadi worker.
Ha ka shithi ba la phah sha u Myntri Rangbah ka president jong ka AGHAWHF ka Monika D Sangma ka la ong ka jingbym lah ban pyndep ïa ka jingpyntreikam ïa ka Memo ka tarik 2 u bnai Jylliew 2023, kaba ïadei bad ka jingkyntiew kyrpad ïa ka kam Senior Graduate Anganwadi Worker, ka jingthung ïa ka kam contractual Lady Supervisors, bad ka jingdawa na ka bynta ban kyntiew kyrpad ïa ki kam Senior Graduate Anganwadi Worker kiba dang trei ka long kaba kongsan. Kum kine ki kam ki long kaba kongsan naba ka ktah ïa ki nongtrei.
Ka la ong ba ka memo kaba la pynmih 2 tarik u Jylliew 2023, kadei kaba la buh ïa ki kyndon na ka bynta ka jingkyntiew kyrpad ïa ka kam Senior Graduate Anganwadi.
“Kum kine ki jingpynslem ban pynurlong ïa ka jingbthah hapoh ka memo ka la ktah bha ïa ki nongtrei, kiba la shakri ïa ka kam Anganwadi system mynta lah bun snem. Kane ka memo la pynmih na ka bynta ban pynbha ïa ka kam jong ki Senior Graduate Anganwadi Worker kiba dei ruh kiba la noh synniang bad ryngkatlang bad ka jingnang jingtip jong ki,” ong ka Monika da kaba bynrap ruh ba kane ka jingpynslem ym tang ba ka la ktah ïa ki jingshakri jong ki hynrei ka la ktah ruh ïa ki jingthmu ba bha jong ki.
Ha kaba ïadei pat ka jingthung kam ïa ka longkmie kum ka superviser ha ka kam contractual, ka president ka la ong ba ka jingbym don ki jingpynbeit na ka bynta ka jingthung ïa ka kam Lady Supervisors ka la pynmih ïa ka jingbym ai ka jingbishar kaba hok hapdeng ki Anganwadi worker kiba dang trei ïa ka kam mynta.
Shuh shuh na ka liang ka Monika ha ka shithi ka la ong ba ka All Garo Hills Anganwadi Worker & Helpers Federation ka kyntu ïa ka sorkar ba kadei ban khmih shwa nyngkong ïa kiba dang trei bad kiba la rim ha ka kam na ka bynta ban kyntiew kyrdan ïa ki kam Senior Graduate Anganwadi Worker.
“Kine ki nongtrei ki la aiti ïa ki jingim jong ki halor ka kam Anganwadi bad ki la dei ruh kiba la tbit ha ka kam mynta lah bun snem. Ki don ruh ha ki jingtbit jong ki ha kaba ïadei bad kane ka kam kaba ki la trei la slem kumta dei ban kyntiew kyrdan ïa ki. Kane ka jingdawa ka long ruh katkum ka jingtbit jong ki. Kine ki nongtrei kidei ruh kiba la don bha ka jingieid ïa ki khynnah, ki kmie ki kpa bad kumjuh ruh ïa ki jingshakri ïa ki longïing longsem bad ka kumjuh ki jingtbit jong ki,” ka la ong.