Shillong, Nohprah 23 : Ka Bharatiya Janata Party (BJP) kaba ïalam ïa ka sorkar ha ka sorkar pdeng ka la rai ban sei kyrtong ha baroh ar tylli ki District Council, kata ha KHADC bad JHADC ha kane ka elekshon MDC kaban sa long ha u Rymphang jong u snem ban wan.
“Ka party ka la ailad haduh ka 30tarik u Nohprah mynta u snem na ka bynta ki kyrtong kiba kwah ban pan tiket na ka bynta ka elekshon MDC ha KHADC bad JHADC,” ong u Nongai ktien ka BJP, Bah MH Kharkrang haba kren bad ki lad pathai khubor.
Shuh shuh u la ong ruh ba ïa ki aplikeshon, ki kyrtong ki lah ban phah sha ki District President kata ban ïoh shwa ïa ka jingithuh bad ka jingmynjur na ki bad ïa kane pat yn sa rah sha ka State Election Committee kaban shim ïa ka rai,” la bynrap shuh shuh u Nongai Ktien ka BJP.
Haba jubab halor ka jingkylli halor ka jingslem palart ban pynbna kyrtong, na ka liang u Nongaiktien u la ong ba ka por kam pat dier satia namar wat kiwei ki party ruh bun kim pat pynbna lut ïa ki kyrtong.
Tangba u ong pat ba ki tikna ba ka party ka kwah ban sei kyrtong ha kiba bun ki constituency jong kine ki ar tylli ki district ouncil.
Shuh shuh u ong ba watla kin ym lah ban buh kyrtong ha baroh 29 tylli ki constituency jong ka KHADC bad ruh kumjuh ha JHADC hynrei kin pyrshang pat ban don kyrtong ha kito ki jaka ba ka party ka sngewthuh ba ki don ka jingkyrmen ba ki kyrtong kin lah ban leh bha.
U ong ruh da da kaba pynieng kyrtong ha ka MDC, kane kan ïarap ruh ïa ka party ban ïoh kham bun ka jingdon ki nongbud bad ki nongkyrshan ba shitrhem jong ka party.
