Shillong, Nohprah 22: Kawei ka longkmie kaba dei ka nongshong shnong jong ka sor Tura jong ka West Garo Hills District ka la ujor sha ki pulit ba ha ka 18 tarik u Nohprah, 2024 ka la ïoh ïa ka jingpyntip ba trai ka Acceroni Enterprise’ Mrinal Kalita ba la phah pisa sha ka account jong ka.
Ha kane ka jingujor ka longkmie ka la pyntip sha ki pulit hynrei khlem kwah ban pyntip paidbah ïa ka pisa katno la phah sha ka account jong ka, kiba tip ïa kane dei tang ki pulit kiba hap ban tohkit.
Na ka liang jong kaba ujor ka la don ka jingsuba ba la don ban pyndonkam bakla ïa ka account jong ka khlem da ka jingtip ka jong ka ne khlem ka jingai jingbit na ka liang jong ka ban pyndonkam ïa ka account jong ka.
Ha kawei pat ka jingjia ki pulit ki la ïathuh ba u Bhubananda Koch uba na ka shnong Taktaki (SWGH) u la phah ka jingujor ba ha ka 19 tarik mynta u bnai ha ka por kumba 3.45 baje nohphai sngi, uwei u briew uba kyrteng u Dharmen Koch uba na kajuh ka shnong u la ktah kti ïa u para jong u, uba kyrteng u Bipilindo Koch ba la 43 snem ka rta.
Ha kane ka jingjia utei u lanot u la mynsaw jur bad la pynkitnoh sha Civil Hospital Ampati ban shah sumar bad nangtei la pynkynriah noh sha Civil Hospital Tura ban shah sumar shuh shuh halor kane ka jingmynsaw jong u.
