Nongpoh, Nohprah 22: Ka jaka ri bad sumar ïaki riew tymmen bala tip kum ka Kripa Victoria Senior Citizen Home kaba don ha Umroi kala pynlong ïaka jinglehkmen Pre Christmas haka sngi Saitjaiñ ban lehkmen bad ki riew tymmen kiba ka ria bad sumar ha katei ka jaka.
Ha katei ka jinglehkmen khristmas la sakhi ruh da ka jingdonlang ka kong Victoria Wahlang, Project Director ka Kripa Victoria Senior Citizen Home, Bah Shered Wahlang, Project Director ryngkat ki nongtrei lem bad ki riew tymmen kiba don ha katei ka jaka.
Lyngba katei ka jinglehkmen khristmas ka long ruh ka jingkmen ïa katei ka jaka ri ïaki riew tymmen halor ka jingseisoh bad ka jingshakri ban ri ban sumar ïaki haka rukom kaba bit ba biang.
La pynphuh pynphieng ruh ïa katei ka jinglehkmen da ki jingrwai, ki jingshad bad kumjuh ruh ka jingsam ïaka ktien jong u Blei halor ka jingwan longbriew jong u trai Jisu sha kane ka sla pyrthei kaba dei ka khubor ba bha bad ka jingkmen ba kum ki khun khristan ha satlak ka pyrthei ki rakhe bad mane.
