Da ka surok ba 5.59 klur wanrah u Bah Sanbor ban weng ïa ka dheng kali ha ka thaiñ Rilbong

Shillong, Nohprah 12 : U MLA ka Shillong South, Bah Sanbor Shullai ryngkat ka jingdonlang ki ophisar naka tnad PWD ha ka step sngi Balang u la leit ban jurip ïa ka jingpyntrei ïa ka surok kiban pynïasoh sha ka surok bah ha Rilbong Point kaba la mang ha ka jinglut kaba kot sha ka 5.59 klur tyngka.
Katkum ka jingong jong u Bah Sanbor, kane ka surok kan weng ïa ka jingdheng kali kaba ki paidbah ki ju mad na ka por sha ka por khamtam na bynta ki phra tylli ki Dorbar Shnong kiba don ha katei ka thain.
Ha kane ka jingleit jurip, la donlang ruh naduh ki nongïalam shnong, ki heh pulit bad ruh ki heh sorkar.
Kane ka surok ka dei kaba ïaid na syndah ka kynroh jong ka Iing Dorbar Thawaiñ ka Jylla bad kan mih pat ban ïasoh bad kawei pat ka surok na lyndet jong ka Iing Dorbar ter ter shaduh Jingkieng Umshyrpi.
Na ka liang u Bah Sanbor u la kyntu ïa ka tnad PWD ba kan shimkhia khnang ba ïa kane ka surok yn lah ban pyndep noh kham kloi la kumno kumno ha u Rymphang jong u snem ban wan kaban long ka jingmyntoi ïa ki nongshong shnong ka thaiñ.
U Bah Sanbor haba kren ha kane ka sngi u la ong ba u la trei borbah na ka bynta ban pynïoh ïa kine ki ar tylli ki surok khnang ba ki paidbah ka thain kin suk ha ka leit ka wan bad ban lait na ka dheng kali kaba baroh baroh ki khnium lut khamtam tang shu poi ki kynta ba ïa beh por.