Shillong, Nohprah 11 : Ka seng kaba la shah khein beaiñ ka Hynniewtrep National Liberation Council (HNLC) mynta ka Sngi Balang ka la pynpaw ka jingpyrshah jur halor ka jingrai jongka sorkar MDA ba la ïalam da ka NPP ban pynjlan ïa ka jingaiwai ïa ki jaka sorkar na ka 30 snem sha ka 60 snem bad halor kane ka khot bad ïawer ïa ki paidbah ban ïeng pyrshah ïa kane ka polisi treikam jongka sorkar.
Ha ka kyrwoh khubor jong u General Secretary uba dei ruh u Publicity Secretary u bah Sainkupar Nongtraw u la ong “ Ka seng ka khot bad ïawer ïa baroh ban pyrshah jur ïa kane ka polisi pyrshah ïa ki paid nongshong shnong. Ngi dei ban buh hakhmat ïa ki kam pynroi pynpar ba leh da da ki trai ri trai muluk ban pynthikna ba ka jaka puta ka neh ha kti ki briew jong ngi. Ka jingseng kam seng jam la jong, ka jingtreikam ba ïaineh bad ka jingsynshar hi ka dei ka lynti kaba biang ym da ka jingwan khniot bor kiba na bar.
U la ong ba kane ka buit poh jongka sorkar ban pynjlan ïa kane ka snem ban aiwai na ka 30 sha ka 60 snem kam dei kaei kaei ruh hynrei ka dei ka jingshet kylla ïa ka hok long trai jaka puta jong ki trai shnong.
Ka jingleh mynleh ban leh da kane ka buit hana ban khring ïa ki nongwan seng kam seng karkhana, ha ka jingshisha kane ka polisi ka thmu beit ban die duh ïa ki jaka puta ba la buh da ki longshwa man shwa sha ki bar jylla bad ki kompani ne corporation. Ka buh ïa ka jaidbynriew Hynniewtrep ha ka jingma bad ka lawei ba dum ban knieh lut bad ïuhroit da kaba ong shuh shuh ba ka jaka puta kam dei tang ka nongkynti hynrei u thied snam jongka jaidbynriew Hynniewtrep. Da kaba pynjlan ïa kane ka snem ban ai wai ka mut ba ka sorkar ka la ailad ïa kiwei ki jaidbynriew ban long trai ïa ki jaka puta ba kongsan sa ar pateng ei ei kynnoh ka HNLC.
U bah Nongtraw u la kynnoh ba kane ka polisi jongka sorkar kam dei na ka bynta ka roi ka par hynrei ka dei ka jingpynlong langknia ïa ki hok ki pot jong ki trai ri trai muluk, ban myntoi kita ki heh saipan ne ki kompani ba nabar. Ka Projek ba 300 klur tyngka jonga Orchid Polo kam dei ban kyntiew ïa ki paid Hyniewtrep hynrei ka dei ka jingpyntroiñ pynban ïa ka kolshor tynrai, pynjulor ïa ka mariang bad pynhiar ïa ka ïoh ka kot.ïa ka sur jong ki nongsengkam lajong kiba dei ki trai shnong ki nongïasaid na ka bynta ka mariang bad ïa ki khlieh nongsynshar la set kak noh tang na ka bynta ban myntoi ki bar jylla.
