Shen yn pyndap noh ka sorkar ïa ki 1000 tylli ki kam hikai kiba lait ha ki skul sorkar bad ki college

Shillong, Nohprah 11 : Ka sorkar jylla shen kan sa pyndap noh ïa ki 1000 tylli ki kam nonghikai kiba lait thylli ha ki skul sorkar kumjuh ha ki college kiba don kylleng ka jylla.
Haba pyntip ha kane ka sngi Balang, u Myntri ka tnad Pule Puthi ka sorkar jylla, Rakkam A Sangma u la ong, “Ha kine ki shibnai ban wan ngin sa pynbna noh na ka bynta ban pyndap ïa kine ki 1000 tylli ki kam kiba lait ha ka tnad pule puthi ka sorkar jylla kynthup naduh ka Higher and Technical Education, College bad kumjuh ha ka Higher Secondary, Secondary bad ruh ha ki Primary School.”
Shuh shuh u ong ba ha kine ki ar bad lai taïew ban wan kin sa pynmih noh ïa ki jingpynbna lait kam na ka bynta ban pyndap ïa kitei ki kam kiba lait.
U Myntri u la pyntip ruh ba ka rai jong ka sorkar jylla ban sdang noh ïa ka science stream ha ki san tylli ki college bad commerce stream ha ki lai tylli ki college ki la pynlong ïa ka jingdonkam ban thaw haduh 248 tylli ki kam hikai kiba lait.
“Ngin sa khot noh shen ïa ka jingpynbna lait kam khnang ba ngin lah pat ban sdang noh ïa kine ki klas naduh ka samoi kaban wan,” u la ong.
Ha kajuh ka por u la ong ruh ba ka jingthung ïa u Vice Chancellor na ka bynta ka Captain Williamson Sangma State University la dep ban pyndep.
U ong ruh ba ki kwah ban sdang noh ïa ka post graduate naduh ka samoi kaban wan bad kumta na ka liang ka university kan sa pynlong noh kham kloi ïa ka jingpyndap ïa ki kam kiba donkam.