Shillong, Nohprah, 11: Ki dkhot jong ka Khasi Students Union (KSU) ki la khie bitar lep hadien ba uwei u Pulit u la loit ki lama iong ba pyrshah ïa ka Citizenship Amendment Act (CAA) ba la teh da ki dkhot jong ka KSU ha ka thaiñ Polo ha ka sngi Balang.
Ka KSU ka la teh ïa ki lama iong hadien ba ka North East Students Organisation (NESO) ka la pynbna ïa ka 11 tarik Nohprah kum ka sngi badum ïa ka thaiñ Shatei Lammihngi baroh kawei hadien ba ka Rajya Sabha ka la mynjur ban pynlong aiñ ïa ka Citizenship Amendment Bill (CAB).
Ha ka video ba la phah da ka KSU sha ki lad pathai khuubor la sakhi, hadien kane, ki dkhot ka KSU ki la leit ban ïakren markhmat bad u Pulit uba loit ïa ki lama iong bad dawa ruh ba u dei ban leit teh biang ïa ki lama iong hadien ba u la kam ba um shym la poi pyrkhat ban pule ïa ka jingthoh ha ka banner shwa ban loit ïa ki lama ba la teh da ka seng.
La ruh sakhi ba ki dkhot ka KSU ki la teh ïa ki banner bad ki jingthoh ba pyrshah ïa ka CAA ha kylleng ka sor, khamtam ha ki jaka ba pawkhmat kum ha Khyndai Lad, ha Motphran, Lad Civil Hospital bad ha kiwei kiwei ki jaka.
Ki jingthoh ha ki banner kiba ka KSU ka la teh la thoh ïa ki kyntien, “Ko Sorkar Meghalaya lano kan kut ka eksamin ILP? Ngi la thrang ïa ka result,” “Ka CAA ka dei ka aiñ Ïakjakor ban pynkylla rit paid ïa ki Khasi,” “Ngi pan ïa ka ILP hynrei phi pynshitom pynban ïa ngi da ka CAA, ka jinglehraiñ ïa ka Sorkar NDA,” bad kiwei kiwei.
Ïa ka jingteh lama iong, la ïashim bynta lang da ki kynhun bapher bapher kiba don hapoh ka thaiñ Shatei Lammihngi ka ri India.
