Shillong, Nohprah 09 : Ka Sorkar Jylla ha ka sngi Nyngkong ka la tyrwa ïa ki tarik na ka bynta ban pynlong noh ïa ka elekshon MDC ha ki ar tylli ki Autonomous District Council (ADC), kata ha Khasi Hills Autonomous District Council (KHADC) bad kumjuh ruh ha Jaintia Hills Autonomous District Council (JHADC) bad mynta kin phah pat sha u Lat ka Jylla, u CH Vijayashankar ban ïoh ïa ka jingmynjur.
Haba kren bad ki lad pathai khubor hadien ba la kutka jingïalang jong ka kynhun Myntri, u Myntri Rangbah ka Jylla, Conrad K Sangma u la ïathuh ba hadien ba ïa ki tarik elekshon la dep ban pdiang da ka Kynhun Myntri ki ap pat mynta sa ïa ka jingmynjur na u Lat ka jylla ha shwa ba kin pynbna noh ia ka tarik.
“Dei tad hadien ba la ïoh ia ka jingmynjur na u Lat ba ngi lah ban pynbna paidbah ïa ka tarik elekshon kaba tikna bad kaba pura,” la bynrap shuh shuh u Myntri Rangbah.
Haba jubab halor ka jingkylli, na ka liang u Conrad u la ong ba kan ym long satia kaba dei ïa u ban ïathuh lypa ïa ka tarik kaba ki la tyrwa katba kim pat ïoh ïa ka jingmynjur na u Lat.
Lah ban kdew hangne ba ha kine ki khyndiat taiew ba la dep, ki party bapher bapher ki la shongshit ban pynkhreh bad pynbna ïa ki kyrtong na ka bynta kane ka elekshon MDC kaba baroh ki khmih lynti ba kan long noh ha u Rymphang ne Lber mynta u snem.
Ka samoi treikam jong ka KHADC bad JHADC kala kut la shisnem mynta hynrei namar ba ka don ka jingpynbeit thymmai ïa ki constituency ba kin long lang mar kumjuh, na ka liang ka sorkar jylla ka la pynjlan haduh arsien ïa ka samoi treikam jong ki bad kane ka jingpynjlan kan kut ha ki sdang taiew jong u Lber 2025.
