U Dr. Mukul un dang hap shong ha ka Liang Pyrshah, ka NPP kan ïalam ïa ka Sorkar: Dy. Speaker

Shillong, Jylliew, 08: U Symbud Lamphang jong ka Ingbishar Thawaiñ ka Jylla u Timothy D. Shira u la pynpaw ka jingsngew skhem baka National People’s Party (NPP) kan sa wan phai biang sha ka bor synshar ha u snem 2023.
U Shira uba la ïoh mihkmat haduh lai sien kynthih na Resubelpara u la ong ba ka All India Trinamool Congress (AITC) hapoh ka jingïalam jong u Mukul Sangma kan dang hap ban shong ha ka Liang Pyrshah katba ka Congress kan ym jop wat tang uwei ruh ha rilum Garo.
U la ong, “ha rilum Khasi-Jaiñtia, ngi khmihlynti ban jop 14 bad ha rilum Garo Hills ban jop 16. Da kane ka jingjop ngin sa long ka kynhun kaba bunpaid bad ngi lah ruh ban jop kput,” ong u Shira haba ïakren bad ki lad pathai khubor.
“Hynrei lada ka jingbunpaid ka kiew tang 30 lane 31, ka sorkar jong ngi kna ym skhem bad ngi donkam ban ïasynrop bad kano kano ka seng sain pyrthei ban pynskhem ïa ka Sorkar,” u la ong.
U la ong ba ki jingkynnoh pyrshah ïa ka Sorkar kin don beit bad ong ruh ba ki la don bun tylli ki jingkynnoh bamsap ha ka por ba dang synshar ka Congress na ka liang jong ngi bad na kiwei kiwei pat ki liang bad mynta ruh ki mih ki jingkynnoh ba laiphew jait pyrshah ïa ka sorkar jong ngi.’
Shuh shuh une nongïalam jong ka NPP u la ong ba ka long kaba shai ba ka AITC lymne ka Congress kin ïoh bat satia ïa u lakam synshar ha u snem 2023.
U la kam ba ka AITC kam buh jingma eiei ruh em ïa ka NPP hynrei kan sa shah pyntroiñ shwa ban poi ka elekshon.
U la kynnoh ba ki don katto katne ki MLA ka AITC kiba la phah ïa ki ksiang sha ka NPP ban pynpaw ïa ka mon ba ki la kwah ban pynïasoh sha kane ka NPP. Katkum ka jingong jong u, ka NPP ka la kyntait ban pdiang ïa ki.
“Nga tharai kumba 75% na ki, kin wan pynïasoh sha ka NPP bad lada ngi pdiang, kumno ngin ai jaka ïa ki? Ngim lah ban pdiang lut ïa baroh dei na kata ka daw ngi la kyntait. Tang khyndiat ngut ki ban shah pdiang hynrei ym baroh. Ngi la don la ki jong ki kyrtong na kata ka daw ym don jaka shuh ïa ki (MLA ka AITC ban pynïasoh sha ka NPP),” ong u Shira.
Ha kawei pat ka liang u Symbud Lamphang la ong ba ka jingkam jong u President ka MPCC u Bah Vincent Pala ba ka Congress kan sa ïoh bat ïa u lakam synshar ka dei tang ka jingmutdur jong u marwei.
U la ong ba ka Congress ka la lah ban ym jop wat tang uwei ruh ha rilum Garo hynrei ha Rilum Khasi-Jaintia ka lah ban jop la kumno kumno tang 7 ngut eiei.