Pynrem ka DS Lawsohtun halor ka jingshah thombor u khynnah 15 snem; Kyntait ba donkti ki nongshong shnong

Shillong, Jylliew :Ka Dorbar Shnong Lawsohtun, Shillong ha u kyrwoh lyngba u Bah H.Rynjah, Rangbah Shnong ka pynrem jur ha ka ba ïadei bad ka jingjia shah thombor jong uwei u khynnah u ba dang 15 snem rta hapoh Lumparing Stand ka ba la jia ha ka miet jong ka 2 tarik mynta u bnai bad ka ba la pynlong ïa une u khynnah ba un mynsaw jur bad don mynta hapoh ICU.
Na ka liang ka dorbar shnong ka kyntu jur ïa ki bor jong ka aiñ ba ki dei ban thwet bad ban kem mardor ïa baroh kito ki ba donkti ha katei ka kam bymman.
Ha kajuh ka por ka dorbar shnong ka kwah ruh ban pynshai ha ka ba ïadei bad katei ka jingshah thombor jong utei u khynnah ha ki runar ha katei ka miet da ka ba ong ba ka long ka ba sngew kyndit bad pynsyier shibun namar tang khyndiat por hadien jong katei ka jingjia, ki dur ki dar jong une u khynnah u ba la mynsaw ki la saphriang lyngba ki social media da ka ba pynpaw ruh ba ki briew ki ba donkti ha kane ka kam thombor ki dei napoh Lawsohtun.
Kumta ruh khlem da pynslem ka dorbar shnong Lawsohtun ka la khot mardor ïa ka jingïalang bad baroh ki dkhot ka EC ban ïakren bad ban lap ïa ki jingshisha halor kane ka jingjia bad halor ki jingkynnoh ba la pynpaw da ka hymmen jong utei u lanot ha ki social media ka ba la ong ba ki briew ki ba donkti ha kane ka kam thombor ki dei napoh Lawsohtun.
Ka dorbar shnong ka kwah ruh ban pynshai ba hadien ka jingpynlong ïa ka jingtohkit hapoh ki dong ki kyntoit jong ka shnong, la ïoh jingtip ba ym shym la don satia ki briew na kane ka shnong ki ba donkti ha katei ka kam thombor.Ka la ong ruh ba napdeng kito ki ba la shah kem ha ki pulit ym shym la don iwei ruh ki ba dei napoh Lawsohtun.
Kumjuh ruh ki jingthoh ha ki dur jong u lanot u ba la mynsaw ki ba la saphriang ha ki social media ki la pynpaw ruh halor ka jingjia shah thombor ha ka ba uwei u briew u la duh noh ïa la ka jong ka jingim namar ka jingshah thombor ha ki katto katne ngut ki briew ki ba dei napoh Lawsohtun ha kane ka snem ba la dep.
Na ka liang ka dorbar shnong ka pynpaw ka jingsngew bynñiaw ka ba jur halor ki ba kum kine ki jingkynnoh ki bym don nongrim ka ba la wanrah ka jingjah burom ïa ki nongshong shnong bad ïa ka shnong hi baroh kawei.
Shuh shuh ka dorbar shnong ka pynshai ruh ba ym shym la don satia kino kino ki jingjia ne ka jingduh jong ki mynsiem briew ha ki kam thombor ba la don bynta da ki nongshong shnong ka Lawsohtun ha kane ka snem ba la dep.
Nalor kata ka dorbar ka la ong ruh ba ka jingkren da ka hymmen jong utei u lanot lyngba ki social media ka long ka bym shisha, ka bym don nongrim bad ka ba ïalam bakla bad ha kajuh ka por ka ba ktah ruh ïa ka burom ka ijot jong ki nongshong shnong ka Lawsohtun.
Kumta ruh na ka liang ka dorbar shnong Lawsohtun ka kyrpad ïa kito ki ba thep ne post ïa kitei ki dur lyngba ki social media ba kin pan map mardor namar ka jingpynjah burom ïa ka shnong bad ïa ki nongshong shnong ki jong ka.Kumjuh ka dorbar ka kyrmen ruh na ka bynta ka jingïoh khiah jong jong utei u lanot u ba don mynta hapdeng ka jingshah sumar.